عرفانیات

لو جی میں ٹیگا گیا

2012-01-01T21:56:00.000+05:00

اپنے عمار ابن ضیا کو لگا کہ اُردو بلاگنگ میں جو ایک روایت ٹیگ کی ہوا کرتی تھی وہ کافی عرصے سے دم توڑتی محسوس ہورہی ہے۔ لہذا انہوں نے نئے سال کے اس موقعہ پر اس روایت کو زندہ کرنے کی کوشش کرتے ہوئے اپنے بلاگ پر سات سوالات دیئےاور جن چار بلاگران کو ٹیگ کیا ان میں میرا نام بھی شامل کر دیا۔ ذیل میں ہیں ان کے سوالات اور میرے جواب:

2012ء میں کیا خاص یا نیا کرنا چاہتے ہیں؟

۔2012 کاایک خاص ٹارگٹ: طبیعت کے لاابالی پن کو ذرا لگام دینا۔

۔ 2012ء میں کس واقعے کا انتظار ہے؟

۔ سٹاک مارکیٹ کے ٹرن اراونڈ کا۔

۔ 2011ء کی کوئی ایک کام یابی؟

- پہلے سے کہیں زیادہ خود آگاہی، اپنی خامیوں کا عمیق ادراک،پہلی بار۔

۔ 2011ء کی کوئی ایک ناکامی؟

- مختلف اضطراری فیصلوں کے نتیجے میں پیدا ہونے والا کڑمس۔

۔ 2011ء کی کوئی ایک ایسی بات جو بہت یادگار یا دل چسپ ہو؟

- بذریعہ بحرین سعودی عرب جانا۔

۔ سال کے آغاز پر کیسا محسوس کررہے ہیں؟

- بہت پرامید-

۔ کوئی چیز یا کام جو 2012ء میں سیکھنا چاہتے ہوں؟

- سپوکن عربی

اور اب میں انہی سوالات کے ساتھ ٹیگ کر رہا ہوں مندرجہ ذیل ساتھیوں کو:

خاور کھوکھر، عنیقہ ناز، شاکر عزیز اور خرم شہزاد خرم

اس التماس کے ساتھ کہ براہ کرم مطلوبہ پیش رفت کریں۔ شکریہ

پیسہ۔۔۔کتنا آخر؟

2011-12-29T15:40:00.000+05:00

ہماری زندگی کا وقت محدود ہے۔ اس محدود وقت کو لا محدود پیسہ کمانے کے لیے لگا چھوڑنا یہ کیسی بات ہے؟ اور اتنا زیادہ پیسہ کمانا جتنا ہم خرچ بھی نہ کر سکیں، اس کا فائد ہ؟ آپکا پیسہ تو وہی ہے نا جس کو آپ خرچ کر سکیں۔ خوش انسان تو وہ ہوتا ہے جس کی خواہشات اور ضرورتیں محدود ہوئیں نہ کہ وہ جس کے پاس ضرورت سے زیادہ پیسہ ہو۔

اور یہ بھی کیسی بات ہے کہ ان لوگوں کے لیے کمائے چلے جاو جن کے ساتھ گزارنے کے لیے آپ کے پاس وقت ہی نہیں کیونکہ سارا وقت تو آپ اور زیادہ کمانے کے چکر میں رہتے ہو۔ جوانی میں آپ اپنی صحت سے بے پرواہ ہو کر روپے کے تعاقب میں صحت گنوا دیتے ہو۔ بوڑھے ہو کر اس روپے سے صحت واپس خریدنے کی کوشش کرتے ہو۔ لیکن تب بہت دیر ہو چکی ہوتی ہے۔

دل پسند بادام پتیسہ یا dilpasand badam patisa

2011-12-01T19:24:00.012+05:00

co.ccیہ دیکھ کر آج دکھ کے مارے ہنسی نکل گئی کہ گوگل نے
ڈومین کو ڈی انڈیکس کر دیا ہوا ہے۔ یعنی مفت کے مزے لوٹنے والے کو کہیں نہ کہیں، کبھی نہ کبھی امتیازی سلوک سے دوچار ہونا ہی پڑتا ہے۔ حد ہے بھئی۔ حالانکہ والوں نے اپنی سائٹ پر لکھ رکھا ہے کہ

co.cc free domain name works exactly like a .com

اب کیا ہو گا؟

co.ccمطلب اب یہ ہوا کہ یہ والا بلاگ اور دیگر تمام بلاگ جو
پر چل رہے ہیں وہ گوگل سرچ کے نتائج میں نظر نہیں آ پائیں گے۔ گویا اگر ہم چاہیں کہ ہمارا لکھا مواد گوگل پر سرچ کرنے والوں کو نظر آ ئے تو ہمیں اپنا بلاگ کسی سچ مچ کے ڈومین پر لے جانا ہو گا۔

لیکن تب بھی کیا ہو گا؟
تب ہمارا اردو بلاگ گوگل پر انڈیکس تو ہو جائے گا لیکن سرچ میں جب تک لوگ اردو میں اپنا مطلوبہ لفظ یا فقرہ نہیں لکھیں گے وہ کسی اردو بلاگ تک نہیں پہنچ پائیں گے۔ لوگ اردو میں سرچ کرتے وقت رومن اردو کا استعمال ہی کرتے ہیں حالانکہ وہ اردو میں لکھی تحریر کے متلاشی ہوتے ہیں۔ جب تک لوگ دلپسند بادام پستہ کی بجائے گوگل میں

dilpasand badam pista

لکھتے رہیں گے وہ ان انگریزی بلاگز پر ہی جا پہنچتے رہیں گے جہاں مضامین میں یہ الفاظ استعمال ہوئے ہوں گے۔اردو کے کسی بلاگ پر چاہے پتیسے کے بارے میں کیسا ہی بہترین مواد کیوں نہ پڑا ہو، سرچ کی ورڈز انگریزی میں ہونے کی وجہ

سے بیچارہ اردو بلاگ سرچ انجن کی ٹریفک سے محروم ہی رہے گا۔

لیکن پھر بھی۔۔۔

بات یہ کہ آپکا بلاگ یا سائٹ گوگل سے ڈی انڈیکس کر دیا جانا بہر حال ایک تشویشناک بات ہے۔ مانا کہ لوگ فی الحال گوگل میں سرچ کے لیے اردو نہیں لکھ رہے لیکن پھر بھی یہ بات ناقابل قبول ہے کہ آپکا بلاگ گوگل سے منقطع ہی کر دیا جائے۔ اسی لیے ورڈ پریس کو بادل نخواستہ الوداع کہتے ہوئے اس بلاگ کو اس کے سابقہ ڈومین سے اب یہاں بلاگ سپاٹ پر منتقل کر دیا گیا ہے۔

بابی یار Babi Yar

2011-11-24T20:14:00.000+05:00

؀
وہی مکان، وہی گلیاں مگر وہ لوگ نہیں،
یہی مراد تو ہے بستیاں اجڑنے سے۔
انسان کا بھی عجیب معاملہ ہے۔ پیدا ہوتا ہے تو وہ کچھ بھی نہیں ہوتا۔ بعد کی زندگی میں اپنے گمان کے مطابق کامیابی حاصل کرنے کے لیے سالہا سال چیزوں کے حصول اور کاموں کی تکمیل کی خاطر اندھا دھند بھا گتا رہتا ہے، اس بات سے بے خبر کہ اس دوران زندگی گزرتی جا رہی ہے۔
پھر ایک دن غیر متوقع طور پر موت کا فرشتہ مقرر کیے ہوئے وقت سے نہ ایک سیکنڈ پہلے نہ ایک لمحہ بعد جان نکال لینے کے لیے آ پہنچتا ہے۔موت سے اس اپنے شب و روز میں مگن انسان کی یہ دنیا والی زندگی اختتام پذیر ہو جاتی ہے اور پھر وہ ایک اور ہی جہاں میں جا پہنچتا ہے جو اس دنیا ہیں رہتے ہوئے اس کی آنکھ سے اوجھل تھا اور جہاں اب اسے دائمی طور پر رہنا ہے۔
بعض اوقات موت اجتماعی طور پر آن دبوچتی ہے۔ مثال کے طور پر جیسا کہ ستمبر ۱۹۴۱ میں یوکرین کے مقام پر ہوا۔ دوسری جنگ عظیم جاری تھی۔ ہٹلر کی نازی افواج ۱۹ ستمبر ۱۹۴۱ کو یوکرین کے دارلحکومت کیف (Kiev) پر قابض ہو چکی تھیں۔ ۲۶ ستمبر کو جرمن فوج کی طرف سے کیف کے یہو دیوں کے لیے شہر بھر میں ایک اعلانیہ چسپاں کیا گیا جس میں تمام یہودیوں کو کہا گیا کہ ۲۹ ستمبر کو وہ سب اپنا سامان، قیمتی اشیاء، نقدی، دستاویزات ہمراہ لیے،گرم کپڑے پہنے صبح آٹھ بجے شہر میں واقع یہودیوں کے قبرستان کے قریب جمع ہو جائیں۔ نہ پہنچنے والوں کو گولی سے اڑا دیا جائے گا۔
نازیوں کو امید تھی کہ کوئی پانچ چھ ہزار یہودی اس دن وہاں اکٹھے ہو جائیں گے لیکن وہاں تو تیس ہزار سے زیادہ یہودی۔۔۔آدمی، عورتیں، جوان، بوڑھے،بچے۔۔۔ اپنے مال و متاع سمیت آن پہنچے۔ دراصل نازیوں نے اس قدر مہارت اور چالاکی سے سارا منصوبہ ترتیب دیا تھا کہ یہودی آخر وقت تک یہی سمجھتے رہے کہ ان کو وہاں اس لیے اکٹھا کیا جا رہا ہے تا کہ ان سب کی کسی اور علاقے میں نقل مکانی کی جائے جہاں وہ اکٹھے مل کر آباد ہو سکیں۔سب یہودی اسی گمان میں رہے کہ جلد ہی ان کو ریل گاڑیوں میں سوار کر دیا جائے گا۔
جب تک حقیقت ان پر کھلی تو بہت دیر ہو چکی تھی۔جب ان کو مشین گنز چلنے کی ترتراہٹ سنائی دینی شروع ہوئی تو تب کسی کے لیے بھی جان بچا کر فرار ہونا ممکن نہیں رہا تھا۔انتہائی منظم طریقے سے تمام یہودیوں سے ان کا سامان لے لیا گیا اور ان کا تمام لباس اتروا لیا گیا۔پھر دس دس یہودیوں کو فوجی بابی یار کی طرف ہانک کر لے جاتے جہاں ان کو گولیوں سے اڑا دیا جاتا۔بابی یار کیف میں واقع ایک گھاٹی کا نام ہے جو تقریباً ۱۵۰ میٹر لمبی، ۳۰ میٹر چوڑی اور ۱۵ میٹر گہری ہے۔دو دن میں ۳۳۷۷۱ یہودی گولیاں مار کر ختم کر دیے گئے اور بابی یار میں ان کی لاشوں کے انبار لگا دیے گئے۔
اور رہا انفرادی موت کا سلسلہ تو وہ تو ہمارے ارد گرد چلتا ہی رہتا ہے۔ انسان اپنے خاندان والوں کو اور دوست احباب کو فوت ہوتے دیکھتا تو ہے لیکن کسی نہ کسی طرح اپنے لیے اس کے دل میں یہی گمان رہتا ہے کہ یہ تو دوسرے لوگ ہیں جو فوت ہوتے ہیں، میں نے تو ابھی زندہ ہی رہنا ہے۔میں تو ابھی صحتمند ہوں،میرے تو بہت سے منصوبے ابھی ایسے ہیں جن کو میں نے پورا کرنا ہے، میں تو ایک اہم انسان ہوں۔۔۔یہ گھر یا یہ ادارہ میں ہی تو چلا رہا ہوں۔میں ابھی فوت نہیں ہوسکتا۔
جبکہ حقیقت یہ ہے کہ موت بہت ہی چپکے سے آ جاتی ہے۔ضروری نہیں کہ کوئی بیمار ہی ہو یا بدحال ہو تو ہی مرتا ہے۔ موت ایسے میں بھی آن دبوچتی ہے جب آپ باتیں کر رہے ہوں، پانی پی رہے ہوں، ہنس رہے ہوں:

موت کے ساتھ ہی توبہ کا دروازہ بند ہو جاتا ہے اور اعمال کا سلسلہ موقوف ہو جاتا ہے۔یہ جو وقت ہمیں ملا ہوا ہوتا ہے یہ بس ایک مہلت ہی ہے۔سٹیو جابز کا یہ کہا Your time is limited بہت قابل غور ہے۔ لیکن جیتے جی ہمیں اس بات کا احساس ہی نہیں ہوتا۔ نہ ہی یہ بات یقین میں آ تی ہے کہ زندگی میں جو کچھ ہم کر رہے ہیں، موت کے بعد اس سب کے لیے ہمیں اپنے خالق کے ہاں جواب دہ ہونا ہے اور پھر سزا اور جزا کا سلسلہ ہے۔ہمارا دل یہ مان کے ہی نہیں دیتا کہ دنیا کا یہ سلسلہ عارضی ہے۔۔۔

؀
وہ وقت،وہ محفلیں،وہ شگوفتہ مزاج لوگ
موج زمانہ لے گئی جانے کہاں کہاں

زندگی

2011-11-14T20:43:00.000+05:00

مڑے ہوئے پتوں پہ
بوندوں کی کھنک۔۔۔
زیروبم،
لاجونتی،
مدھ بھری،
ارغوانی زندگی۔

زندگی۔۔۔
تتلی،
ترنگ،
سوہنی
سہانی زندگی۔

ہوا مارنا

2011-06-23T20:23:00.000+05:00

کسی کا حق مارنا، کسی کے پیسے مارنا وغیرہ جیسی غلط کاریاں تو آپ سنتے ہی رہتے ہیں ۔آج میں آپکی توجہ ایک اور اہم معاشرتی مسئلے کی جانب مبذول کروانا چاہتا ہوں۔ وہ ہے ہوا مارنا۔ آپ اپنی گاڑی کسی سروس سٹیشن پر لے کر جاتے ہیں کہ اس کی دحلائی ستھرائی کروا لیں تو وہ لوگ کاروائی کا آغاز ہوا مارنے سے کرتے ہیں۔

گاڑی کے چاروں دروازے کھول دیئے جاتے ہیں اور ایک صاحب ایک پائپ پکڑ کر اس میں سے نکلتی تیز رفتار ہوا گاڑی کے فرش اور تمام کونوں کھدروں میں مارنا شروع کر دیتے ہیں۔اب اپنے گمان کے مطابق تو وہ گاڑی کی صفائی کر رہے ہوتے ہیں لیکن حقیقت میں جو ہو رہا ہوتا ہے وہ یہ ہے کہ گاڑی کے فلور میٹس پر پڑی تمام گرد و دیگر گند بلا اڑ اڑ کر ڈیش بورڈ اور اطراف میں جا بکھرتا ہے۔ اس عمل سے گاڑی کا اندر صاف ہونے کی بجائے اور گندا ہو جاتا ہے۔

سوال یہ ہے کہ وہ لوگ ہوا مارنے کی بجائے ویکیوم کلینر کا استعمال کیوں نہیں کرتے؟ ویکیوم کلینر گند بلا کو دور دور تک اڑانے کی بجائے اپنے اندر کھینچ لے گا جو کہ گاڑی کے اندر کی صفائی کا ایک زیادہ منطقی طریقہ ہے۔ اور یہ بھی نہیں کہ ویکیوم کلینر خریدنے کے لیے کوئی لاکھوں روپے درکار ہوتے ہیں۔ نہ ہی یہ ہے کہ ویکیوم کلینر ایسے مقاصد کے لیے کسی بھی سروس سٹیشن پر استعمال نہیں ہو رہے۔ دبئی میں دیرہ کے علاقے میں ایک دفعہ میں نے دیکھا تھا کہ وہ لوگ گاڑی کے اندر ہوا نہیں مار رہے تھے۔ ویکیوم کلینر استعمال کر رہے تھے۔

اب سروس سٹیشنز کی بات ہو رہی ہے تو ان سے متعلق ایک اور رونا بھی رو ہی لیا جائے: گاڑی کے پچھلے شیشے کو سردیوں میں دھندلا جانے سے بچانے کے لیئے ڈی فراسٹر لگا ہوتا ہے جس کو ہم ڈیش بورڈ میں لگے ایک بٹن سے آن آف کر لیتے ہیں۔ لیکن یہ کارآمد سسٹم بہت جلد کام کرنا چھوڑ دیتا ہے اور اس کا سہرا بھی سروس سٹیشن والوں کے سر ہے۔ان کے بے خبر لڑکے بالے صفائی کے زعم میں پچھلے شیشے کے اندر کی طرف اس قدر زور سے دبا دبا کر کپڑا لگاتے ہیں کہ وہاں لگی ڈی فراسٹر کی سٹرائپس ان کے دباو کی تاب نہیں لا سکتیں اور کہیں نہ کہیں سے کٹ جاتی ہیں۔اب یا تو گاڑی بنانے والے ان سٹرائپس کو شیشے کے اندر یا باہر لگانے کی بجائے شیشے کے درمیان میں لگاتے جہاں کوئی چیز ان سے مس نہ ہوتی۔ لیکن ایسا کرنا گاڑی کی قیمت میں اضافے کا باعث بنتا۔ یا پھر یہ ہے کہ سروس سٹیشن والے ہی کچھ احساس اور درد مندی اس سلسلے میں پیدا کر لیتے۔

لیکن چونکہ یہ دوسرا امکان پہلے والے سے بھی زیادہ کم ہے اس لیے یہی کیا جا سکتا ہے کہ سروس سٹیشن والوں کو کہہ دیا جائے کہ بھائی پچھلا شیشہ اندر سے صاف نہ کرنا۔ لیکن آپ کہہ کر دیکھ لیں۔ آپ ان کی جتنی بھی منت سماجت کر لیں اس سلسلے میں، آپ کو تو وہ لڑکے کہہ دیں گے کہ اچھا جی نہیں کرتے لیکن جیسے ہی آپ کا دھیان ادھر ادھر ہوا، وہ لوگ عادت سے مجبور ہو کر اندر سے شیشے کی رگڑائی کر ہی ڈالیں گے۔ اب اس کا کیا کیا جائے،جبکہ منقطع شدہ ڈی فراسٹر کی مرمت بھی عام حالات میں آسان نہیں۔

NUST...National University for Sleeping Tight

2011-05-31T17:45:00.000+05:00

گاڑی تیز چلانا

2011-05-30T19:23:00.000+05:00

مجھے وہ لوگ بالکل اچھے نہیں لگتے جو گاڑی تیز چلاتے ہیں۔ اسی لیے میں ان کو اوورٹیک کر لیتا ہوں۔

بری لت

2011-05-23T03:21:00.000+05:00

یہ بھی ایک عجیب مصیبت ہوتی ہے بعض لوگوں کے ساتھ۔کسی کے گھر جو جاتے ہیں مہمان بن کر تو وہاں جا کر میز بان کو کہہ کر ٹی وی پر اپنی پسند کا چینل ٹیون کروا لیتے ہیں اور پھر گھنٹوں بیٹھ کر اپنے من چاہے ڈرامے دیکھتے رہتے ہیں۔ میز بان بیچارہ ساتھ میں مفت میں ٹنگا رہتا ہے۔ سوچتا رہتا ہے کہ بھئ آپ میرے گھر مجھ سے ملنے، مجھ سے باتیں کرنے کے لیے آئے تھے یا اپنے گھر کے ٹی وی بینی کے معمولات پورے کرنے؟ یہ میرا گھر ہے یا تھیٹر ہے؟وغیرہ۔

اور پھر کچھ مہمان تو آپ کو کہہ کر اپنے چینل ٹیون کروا لیتے ہیں لیکن کچھ لوگ ایک قدم آگے ہوتے ہیں۔ وہ آپ سے پوچھے بغیر، آپ کو بتائے بغیر سیدھا ریموٹ پکڑتے ہیں اور آپ کے ٹی وی پر اپنی پسند کے چینل ٹیون کر کے دیکھنے بیٹھ جاتے ہیں۔ کمال ہے نا۔

یہ کئی طرح سے ایک نامناسب حرکت ہے۔ ایک تو میزبان اوراسکے اہل خانہ شدت سے محسوس کرتے ہیں کہ انہیں نظر انداز کیا جا رہا ہے اور یہ کہ مہمان کا مطمع نظر ٹی وی تھا نہ کہ ان سے ملنا۔ دوسرا میزبان اس بات سے بھی خفت محسوس کرتا ہے کہ جو چینل ہم لوگ نہیں دیکھتے وہ ہمارے ہی گھر میں بیٹھ کر دھونس سے ہم پر ٹھونسے جا رہے ہیں۔بھئی اگر آپ ہمارے گھر آ ہی گئے ہو تو اپنی ٹی وی کی لت کو کچھ دیر کے لیے خیر باد کہہ دو اور ہم سے بات وات کر لو۔عجب بدتہذیبی ہے :(

ARIEL کا اشتہار

2011-05-08T13:18:00.000+05:00

پاکستان بھر کی عورتوں کا اعتماد......ایریئل......

میرے ہس بینڈ کو کھانے کی بالکل تمیز نہیں۔ جانوروں کی طرح کھاتے ہیں۔ پھر ہاتھ بھی شرٹ سے صاف کرتے ہیں۔ ان کی ایک ہی شرٹ ہے۔میں روز دھو کر سوتی تھی۔

ایک دن ان کے دوست نے ان پر پان کی پیک پھینک دی۔ پہلے تو میں نے ان کو مارا۔ پھر میرے ابو نے ایریئل کا کہا۔

اب میں ایریئل ان کی پاکٹ میں ہی ڈال دیتی ہوں۔ جہاں داغ لگے وہیں بیٹھ کر دھو لیتے ہیں۔ مجھے اب اپنے ہس بینڈ اتنے پسند ہیں کہ میں کسی اور کے بارے میں سوچنا پسند بھی نہیں کروں گی :grin:

دیکھ کبیرا رویا

2011-04-28T15:01:00.000+05:00

عنیقہ نے اپنی ایک پوسٹ میں پاکستان کے مایہ ناز لیڈران اور قائدین کی زندہ مذاق کی صنف کے لیے جو لازوال خدمات ہیں ان سے متعلق کچھ ویڈیوز لگائی ہیں جن کو دیکھ کر دل باغ باغ ہو گیا ہے۔ اسی قبیل کی دو اور ویڈیوز پیش خدمت ہیں۔ آخر تک دیکھیے گا:

خواتین اور حضرات توجہ کریں۔۔۔

2011-04-22T14:32:00.000+05:00

بناو سنگھار کا سامان تیار کرنے والی مشہور زمانہ کمپنی ریولان کے بانی چارلس ریوسن نے کہا تھا :

ہم فیکٹری میں کاسمیٹکس تیار کرتے ہیں، دکانوں میں آس فروخت کرتے ہیں۔

بدلہ لوٹ آیا

2011-03-16T03:18:00.002+05:00

کل مورخہ ۱۴ مارچ کراچی سٹاک ایکسچینج میں تقریباً دو سال کے وقفے کے بعد بدلہ لوٹ آیا۔ سادہ الفاظ میں بدلہ بازار حصص میں رائج اس نظام کو کہتے ہیں جو لوگوں کو ادھا ر پر شیئرز خریدنے کا امکان فراہم کرتا ہے۔ یعنی کوئی شخص گھر سے مثلاً ایک لاکھ ر وپیہ اگر لے کر آیا ہے تو بدلے میں چار پانچ لاکھ روپے کے شیئرز خرید سکتا ہے۔یہ جو اضافی رقم اسے دستیاب ہوتی ہے اس پر اسے سود ادا کرنا ہوتا ہے۔بالکل جیسے بینک سے یا مہاجن سے ادھار لیتے وقت دینا ہوتا ہے۔یہ بدلہ وہی چیز ہے جسے بین الاقوامی منڈیوں میں Margin Tradingیا Leverage کہا جاتا ہے۔

بدلے پر کام کرنے والوں کا گمان یہ ہوتا ہے کہ اصل سرمائے سے زیادہ مالیت کے حصص خریدنے سے یہ ہو گا کہ جب اس شیئر کی قیمت اوپر جائے گی تو وہ زیادہ منافع کما سکیں گے۔ یعنی وہ اگر اپنے اصل ایک لاکھ روپے سے ہی کام کرتے تو دس روپے مالیت کے دس ہزار شیئرز ہی خرید سکتے تھے جن کے دام اگر بارہ روپے فی شیئر ہو جاتے تو ان کو صرف بیس ہزار روپے منافع ہوتا۔ لیکن بدلے کے ذریعے وہ مزید چار لاکھ کے یعنی اب کل پانچ لاکھ روپے کے پچاس ہزار شیئر ز خرید سکتے ہیں جن کا دام اگر دو روپے بڑھ جائے تو ان کو بیس ہزار کی بجائے ایک لاکھ کا منافع ہو گا۔

جو حقیقت وہ نظر انداز کر دیتے ہیں وہ یہ ہے کہ ادھار لے کر خریدے گئے شیئرز کی مقدار بڑھا لینے سے اگر قیمت بڑھ جانے کی صورت میں منافع بڑھ جاتا ہے تو قیمت گھٹ جانے کی صورت میں نقصان بھی تو پانچ گنا زیادہ ہو جائے گا۔ یعنی اگر اپنے ایک لاکھ روپے کے اصل سرمائے سے کام کرتے تو دس ہزار شیئرزپر دو روپے کی کمی کی صورت میں نقصان بیس ہزار کا ہوتا اور وہ باقی اسی ہزار لے کر گھر لوٹ آتے۔ لیکن بدلے میں لیئے گئے پچاس ہزار شیئرز کی صورت میں بھاو دو روپے گھٹ جانے کی صورت میں نقصان ایک لاکھ کا ہوگا اور پھر منہ لٹکائے خالی ہاتھ گھر آئیں گے۔ اور جو قیمت اگر تین روپے گھٹ گئی تو گھر سے مزید پچاس ہزار روپے لا کر بھی دینے ہوں گے۔

کیا کہا؟ آپ تب نقصان پر اپنے شیئرز نہ بیچیں گے اور قیمت واپس بڑھنے کا انتظار کریں گے؟ ارئے جناب ادھاریئے کی انتظار کرنے کی سکت بہت ہی کم ہوتی ہے۔ بازار طویل مندے میں چلی جائے تو قیمت واپس آتے آتے ہی آتی ہے جبکہ اس دوران ہر کلیرنگ میں سود لگ لگ کر آپکی قیمت خرید اوپر ہی اوپر جاتی رہتی ہے۔

اور یہ جو غیر متوقع مندے شیئر بازار میں آجاتے ہیں وہ تو پھر جان ہی لے کر جاتے ہیں۔ مثلاً جاپان کی سٹاک مارکیٹ کو دیکھیں۔ کس کو معلوم تھا کہ وہاں ایسا سونامی آئے گا جو معیشت کی چولیں ہلا کر رکھ دے گا؟ اب دیکھیئے جمعہ والے دن یعنی ۱۱ مارچ کو ٹوکیو سٹاک ایکسچینج کی Nikkei۲۲۵ انڈیکس ۱۰۲۵۴ پر بند ہوئی لیکن پھر اگلے ٹریڈنگ دن پیر کو چھ فیصد کی کمی کے بعد ۹۶۲۰ پر بند ہوئی۔ ایک ہی دن میں مارکیٹ کی کل مالیت میں ۲۸۶ ارب ڈالر کی کمی واقع ہوئی۔ اور آج منگل کے دن یہ انڈیکس ایک ہزار سے بھی زائد پوائنٹس کی گراوٹ کے بعد مزیددس فیصد نیچے ۸۶۰۵ پر بند ہوئی۔ دن کے دوران مارکیٹ ۸۲۲۷ تک بھی آ گئی تھی۔ اب آپ بتایئے اس قسم کی صورتحال میں ادھار پر خریدے گئے حصص کو لے کر کوئی کب تک قیمتوں کی بحالی کا انتظار کر سکے گا؟
اس وقت پاکستان میں رات کے ساڑھے نو بجے ہیں۔ وال سٹریٹ میں ٹریڈنگ شروع ہوئےکوئی تین گھنٹے گزر چکے ہیں۔ ڈو جونز ۱۸۷ پوائنٹس اب تک کھو چکی ہے۔ابھی بازار کو ساڑھے تین گھنٹے اور چلنا ہے۔
اب ایک نظر اپنی مارکیٹ پر بھی ڈال لیتے ہیں۔ کراچی سٹاک ایکسچینج کی ۱۰۰ KSE انڈیکس آج ۲۱۶ پوائنٹس کی کمی کے بعد ۱۱۸۲۹ پر بند ہوئی ۔ دن کے دوران یہ ۱۲۰۰۰ سے بھی اوپر گئی تھی۔ آج ساڑھے پانچ ارب روپے سے زائد مالیت کے کوئی ساڑھے تیرہ کروڑ شیئرز کا کاروبار ہوا۔

اچھا ایک کام کرتے ہیں۔ کچھ پیپر ٹریڈنگ کرتے ہیں۔ یعنی اصل بازار میں اصل رقم لگائے بنا بس کاغذی طور پر کچھ کاروبار کرتے ہیں۔ ہم پاکستان کی قومی فضائی کارپوریشن پی آئی اے کے کچھ شیئرز لیں گے اور پھر آنے والے دنوں میں اس شیئر کے اتار چڑھاو پر نگاہ رکھیں گے اور انشاء اللہ دیکھیں گے کہ ہمیں کیا نفع نقصان ہوتا ہے۔ اس سے ہم کو سٹاک مارکیٹ کے کاروبار کی بابت کچھ آگاہی ملے گی۔
پی آئی اے کا سمبل PIAAہے۔ آج اس کے تین لاکھ گیارہ ہزار حصص کا لین دین ہوا اور بند بھاو 2.93 رہا۔ ہم لکھ لیتے ہیں کہ آج ہم نے اس کارپوریشن کے 20000 شیئرز 2.85 پیسے فی شیئر کے حساب سے لیے جن کی مالیٹ پانچ پیسے کمیشن شامل کرنے کے بعد 58000 روپے بنی۔ اب دیکھتے ہیں ہماری اس سرمایہ کاری کا نتیجہ اگلے ۱۰۰ دنوں میں کیا رہتا ہے۔چلیں۔

افسوسناک

2011-02-01T14:41:00.000+05:00

ہمارے ملک کی اکثریت جو بہتر سکولوں میں پڑھنے کی متحمل نہیں ہو سکتی کیا ان کے لیے بس یہی کچھ ہے:

مرد بڑے ظالم ہوتے ہیں

2011-01-28T21:22:00.000+05:00

ساری زندگی عورت کو کنفیوژن میں ہی رکھتے ہیں۔کبھی تو اس کو لگتا ہے کہ میرا میاں بس مجھ کو ہی دل و جان سے چاہتا ہے اور کبھی اس کو یوں لگنے لگتا ہے کہ اس کا شوہر کسی دوسری عورت سے بھی محبت کرتا ہے۔آدمی کے طرز عمل کے مد و جزر عورت کے ان دو خیالات کا باعث بنتے ہیں۔وہ اندرونی طور پر اسی ادھیڑ بن میں سالہا سال گزار دیتی ہے۔

جدہ میں حالیہ بارشیں

2011-01-27T16:19:00.000+05:00

اس سال بھی سعودی عرب میں بارشوں نے لوگوں کی روز مرہ زندگی متاثر کی:

جدہ کی بارشوں کے مزید مناظر یہاں بھی ملاحظہ فرمائیں۔

دو دوستوں کے درمیان امتحانات کی تیاری پر مکالمہ

2011-01-24T09:06:00.000+05:00

طاہرہ: ارے ملیحہ تم نے فیس بک پر میری نئی تصویریں دیکھیں کیا؟

ملیحہ: طاہرہ یہ تم کیسی باتیں کر رہی ہو؟ امتحان سر پر ہیں۔ مجھے تو ان کی فکر کھائے جا رہی ہے۔میں تو فیس بک وغیرہ سب بھول گئی ہوں۔

طاہرہ: ارے ہاں۔ امتحانات تو واقعی قریب ہیں۔ مجھے بھی ان کا خیال ہے۔مگر اب شاید یہ تو میں نہیں کر سکتی کہ میں ان کی وجہ سے اپنی آنلائن زندگی ترک کر دوں۔

ملیحہ: ٹھیک ہے۔ ہر ایک کی اپنی اپنی سوچ ہے۔ میں تو یہ سمجھتی ہوں کہ اگر میں کچھ عرصے کے لیے اپنی ذہنی تفریح کی کچھ چیزوں کو خیر باد کہہ دوں تو اس کا ثمر مجھے امتحا نات میں اچھی پوزیشن کی صورت میں مل سکتا ہے۔

طاہرہ: یہ بات تو ہے۔ کچھ پانے کے لیے کچھ کھونا پڑتا ہے۔ لیکن میرا خیال ہے کہ ہم امتحا نات کی تیاری اپنی دیگر سرگرمیوں کو جاری رکھ کر ساتھ ساتھ بھی کر سکتے ہیں۔

ملیحہ: لیکن دیکھو کسی بھی کام کے اعلی نتائج کے لیے ہمیں اس کام کو وقت دینا پڑتا ہے۔ اور یہ تو بالکل سادہ سی بات ہے کہ جتنا گڑ ڈالو گے اتنا میٹھا ہو گا۔ جس چیز کو ہم جتنی زیادہ توجہ دیں گے، جتنا زیادہ وقت دیں گے اس کا نتیجہ اتنا ہی زبردست ہو گا۔

طاہرہ: اس میں تو کوئی شک نہیں۔ امتحان میں فیل تو میں بھی نہیں ہونا چاہتی۔

ملیحہ: اور میں محض پاس ہی نہیں ہونا چاہتی بلکہ کوئی پوزیشن بھی لینا چاہتی ہوں۔

طاہرہ: اچھا مجھے یہ بتاو تم امتحانات کی بہتر تیاری کے لیے کیا اقدامات کرتی ہو؟

ملیحہ: ایک چیز تو یہ ہے کہ میں سمجھتی ہوں کہ جو کتاب وغیرہ ہم بالکل صبح کے وقت پڑھتے ہیں وہ ہمیں بہتر طور پر یاد رہتی ہے اور اس وقت ذہنی قوت عروج پر ہوتی ہے۔ اس لیے میں فجر کی نماز پڑھ کر سوتی نہیں بلکہ اپنا مطالعہ شروع کر دیتی ہوں۔

طاہرہ: یہ تو زبردست بات ہے۔ لیکن مجھ سے تو اتنی صبح اٹھا ہی نہیں جاتا۔

ملیحہ: اور میں یہ بھی کرتی ہوں کہ جو صبح پڑھنا شروع کرتی ہوں تو پھر پڑھتی ہی نہیں چلی جاتی۔ کچھ وقت کے بعد کتاب رکھ کر پھر باقی وقت ذہنی طور پر اس تمام کو دہراتی ہوں جو پڑھا ہوتا ہے۔ جو کچھ سمجھ میں آیا ہوتا ہے اس پر غور کرتی ہوں۔

طاہرہ: بہت خوب۔ لیکن میں تو رات کو ہی پڑھ سکتی ہوں۔ شام کو کھانے سے فارغ ہو کر ٹی وی دیکھتی ہوں۔ اس کے بعد جب تک نیند نہ آئےپڑھتی رہتی ہوں۔

ملیحہ: میں بھی رات کو پڑھتی ہوں لیکن پھر صبح بھی جلدی اٹھ جاتی ہوں۔ اور ایک اور بات یہ ہے کہ میں امتحان کی تیاری کے دنوں میں فون پر سہیلیوں کے ساتھ بات چیت سے گریز کرتی ہوں۔

طاہرہ: ایسا کیوں؟

ملیحہ: پتا ہے کیا، فون پر گپ شپ سے اتنا زیادہ وقت ضائع ہو جاتا ہے جس کا کہ ہمیں اندازہ ہی نہیں ہوتا۔

طاہرہ: پھر تو ہمیں یہ بات چیت بھی یہیں ختم کر کے امتحانات کی تیاری کرنی چاہیے۔ اللہ حافظ۔

ملیحہ: اللہ حافظ۔

پنڈی ایگزٹ

2011-01-07T19:13:00.000+05:00

یوں تو مری و گلیات میں کرنے کا نیا تو کچھ نہیں ہوتا کہ ہر بار پہلے والی سرگرمیاں، پہلے والے مناظر ہی دہرانے کو ہوتے ہیں لیکن پھر بھی اس جگہ کی کچھ کشش ضرور ہے۔ اور لاہور سے جاتے آتے ہوئے موٹر وے پہ بھی کچھ خاص کرنے کو نہیں ہوتا سوائے اس کے کہ آپ ڈیش بورڈ پہ بدلتے اعداد و شمار سے محظوظ ہوتے رہیں ۔۔۔۳۳۰۰ آرپی ایم پہ گاڑی کی رفتار ۱۲۰ کلومیٹرفی گھنٹہ ہوتی ہے، گاڑی کی رفتار ۱۰۰ ہو تو انجن کی رفتار ۲۷۰۰ ہو جاتی ہے اور ۱۴۰ کی غیر قانونی رفتار کے لئے پورے ۴۰۰۰ چکر فی منٹ درکار ہوتے ہیں۔ لاہور سے فُل کرایا گیا فیول ٹینک جب گیج پہ نصف ظاہر ہونے لگےتو جان لینا ہے کہ بھیرہ قیام و طعام آ نے کو ہے، آپ بیٹھے انجن کے صوتی مدوجذر سے محظوظ ہوتے رہیں وغیرہ وغیرہ۔

پچھلے سال سکول کی گرمیوں کی چھٹیوں میں نتھیاگلی جانے کا پروگرام بنا۔ اس دفعہ پہلے ایک رات راولپنڈی میں رکنا تھا۔ 29 جولائی کو لاہور سے روانہ ہوئے۔ راستے میں ہمیشہ کی طرح بھیرہ سروس ایریا سے پیٹرول ٹینک پھر سے فل کروایا۔ پھر جب سالٹ رینج کے پہاڑی سلسلے میں داخل ہوئے تو وہاں بارش ملی۔ اس سے پہلے اس جگہ اتنے خوبصورت مناظر دیکھنے کو نہیں ملے تھے۔ بادل بہت نیچے آئے ہوئے تھے۔ بارش بھی خاصی تیز تھی۔

اسلام آباد ٹال پلازہ میں E Toll کی سکرین پر لکھا آیا کہ 235 روپے منہا کیے گئے ہیں۔ مجھے یوں محسوس ہوا کہ جب فروری میں مری جاتے ہوے یہاں سے گزرے تھے تو شاید کچھ کم رقم چارج ہوئی تھی۔ راولپنڈی میں قیام قاسم مارکیٹ کے قریب تھا جہاں ہم سہ پہر کےوقت پہنچ گئے۔

اس سے پہلے موٹر وے سے ہمیشہ سیدھے کشمیر ہائی وے کو چلے جایا کرتے تھے۔ یہ پہلی بار تھی کہ موٹر وے کے بعد راولپنڈی جانا تھا۔ میرا خیال تھا کہ موٹر وے سے آنے والوں کے لیے جیسے جی ٹی روڈ انٹر چینج پر بائیں کو ایک سڑک ٹیکسلا، واہ، پشاور جانے والوں کے لیے بنی ہوئی ہے اسی طرح راولپنڈی جانے والوں کے لیے بھی کوئی ایسا ہی مخرج ہو گا ۔

لیکن مجھے ایسی کوئی سڑک نظر نہیں آئی۔ اب یا تو میں وہی پشاور والی ایگزٹ سے ٹیکسلا، واہ کی طرف مڑ جا تا اور پھر کسی U ٹرن سے گھوم کر اپنا رخ پنڈی کی جانب کرتا۔ یا پھر یہ سمجھ میں آئی کہ میں گوٖلڑہ چوک کی جانب چلتا رہوں اور وہاں سے دائیں مڑ کر گولڑہ روڈ سے جی ٹی روڈ پر جا ملوں۔ میں نے یہ دوسرا والا آپشن ہی اپنایا۔

مجھے لگتا تھا کہ ایسا ہو نہیں سکتا کہ راولپنڈی جیسے مین شہر کے لیے جی ٹی روڈ انٹر چینج پر کوئی ایگزٹ نہ ہو۔ یقیناً ہو گی لیکن مجھے نظر نہیں آئی ہو گی۔ لیکن پنڈی پہنچ کر دریافت کرنے پر یہی بتایا گیا کہ واقعی ایسی کوئی ایگزٹ نہیں ہے اور لوگ بائیں کو جا کر یو ٹرن لے کر ہی راولپنڈی کو آتے ہیں۔ یہ بات تب بھی مجھے انتہا ئی نا قابل یقین سی لگی۔

میں حیران ہوں کیا واقعی موٹر وے کے اختتام پر دائیں جانب پنڈی کو جانے کے لیے کوئی ایگزٹ نہیں ہے؟

ہاں یہ وہی دسمبر تھا۔۔۔

2011-01-05T21:39:00.000+05:00

”دیکھو یہ جو دسمبر ابھی گزرا ہے نا یہ وہی دسمبر تھا جس کا تمہیں انتظار تھا۔اوریہ وہی سردیاں ہیں جن کا ذکر کر کے تم اتنا کچھ کہتے تھے۔

تم کتنے سالوں سے ہر سال یہی کہتے ہو کہ بس ذرا موسم بدل لینے دو، یہ گرمیاں یہ حبس جا لینے دو، سردیاں آ لینے دو بس پھر دیکھنا۔۔۔جتنے رکے پڑے کام ہیں، میں سارے کے سارے ختم کر دوں گا۔
مگر دیکھ لو، آج تک ایسا کچھ ہو نہیں سکا۔ سردیاں ہر سال آتی ہیں اور آ کر گزر جاتی ہیں۔ تم ہر سال کہتے ہو بس دسمبر آ لینے دو ذرا، سردی ذرا صحیح سے شروع ہو لینے دو، میں اگلا سال چڑھنے نہیں دوں گا۔ یکم جنوری سے پہلے پہلے سب التوا میں پڑئےکام، ہاں ہاں سب کے سب تم دیکھنا، میں انشاءاللہ اب کے نمٹا دوں گا۔
لیکن ہوتا کیا ہے۔۔۔گرمیوں میں تمہیں گرمی تنگ کرتی ہے۔بس اے سی کی ہوا دل کو بھاتی ہے۔سردیوں میں تمہیں سردی ستاتی ہے، گرم لحاف سے نکلنے کا تمہارا دل ہی نہیں کرتا۔خزاں میں ناسٹیلجیا تمہارےدل میں گھر کر لیتا ہے اور بہار میں رومانس تمہارے جسم و جاں میں رواں دواں ہو جاتا ہے۔ اور یوں سارا سال تم یہی انتظار کرتے رہتے ہو کہ موسم ذرا معتدل ہو جا ئے تو بس پھر ایک ساتھ ہی سارے کر دیے جانے کے منتظر کام میں سرانجام دے ڈالوں گا۔
میں تمہیں سچ بتاوں یہ محض خود فریبی کا ایک نہ ختم ہونے والا سلسلہ ہے۔تمہیں یاد ہو گا چند سال پہلے جب تمہارے ایک کزن کی وفات ہوئی تھی تو تم تھوڑا ساچونکے تھے۔کیونکہ وہ عمر میں تم سے کوئی زیادہ بڑا نہیں تھا۔تمہارے ایج گروپ کا ہی تھا۔ تب تم تھوڑا ڈرے تھے کہ ایک دن اچانک تم بھی اسی طرح اس دنیا کی زندگی کو خیر باد کہہ دو گے اور تمہیں آخرت اور اس دنیا سے متعلقہ پینڈنگ کام کرنے کا موقعہ ہی نہیں ملے گا۔ تب تم نے اپنےآپ سے کہا تھا کہ یہ سب کام تم کو اب فوراً نمٹا دینے چاہییں۔لیکن تب بھی تم نے ڈیڈ لائن اپنے آپ کو جو دی تھی وہ اُس سال کے دسمبر ہی کی تھی۔
دیکھو میں تو تمہیں یہی کہوں گی کہ تم دائمی سستی اور بے عملی کی یہ روش اب ترک کر ڈالو۔ اب کچھ کر ڈالو۔ یہ جو تمہارے سالہا سال سے التوا میں پڑے کام ہیں یقین کرو یہ کوئی بہت زیادہ وقت طلب نہیں ہیں۔ کچھ تو بالکل ہی چند گھنٹوں میں پایہ تکمیل تک پہنچ جانے والے ہیں۔ اگر تم آج سے ان کاموں کو ایک ایک کر کے کرنا شروع کر ڈالو تو سچی بات ہے ایک آدھ ہفتے میں یہ سب اختتام پذیر ہو جائیں گے۔ تمہا رے اندر کا ایک بوجھ، ایک احساس جرم ختم ہو جا ے گا۔تم خود کو بہت ہلکا پھلکا محسوس کرو گے۔
میری مانو۔۔۔پروگرام اور شیڈول بنانے ترک کر دو۔ جو کرنا ہے وہ کرنا شروع کر دو۔آگے تمہاری مرضی۔“

کوئی دس دن بعد...

2010-12-31T21:30:00.000+05:00

کوئی دس دن بعد اپنے بلاگستان پر نظر ڈالنے کا موقعہ ملا۔ بہت کچھ پڑھنے کو اکٹھا ہو چکا ہے۔ بچوں کی سردیوں کی چھٹیاں اس بار یو اے ای میں گزارنے کا قصد کیا۔ وہاں ا نٹر نیٹ سے گریزاں ہی رہا۔ اب بیٹھ کر آرام سے بلاگران کے لکھے سے لطف اندوز ہوں گا انشاء اللہ۔
2011 کی آمد آمد ہے۔ اس کے آغاز سے ہی کچھ ریزولوشنز بنائی جائیں گی۔ اپنے آپ سے بہت سے عہدو پیمان ہوں گے۔ صدیوں پرانی عادات سے نجات حاصل کرنے کے منصوبے بنیں گے۔ روز مرہ زندگی کے لیے نئے لائحہ عمل ترتیب دیئے جائیں گے۔ لیکن ہو گا کیا۔۔۔
ابھی جنوری بھی ختم نہیں ہوا ہو گا اور زندگی عین اسی روش پر رواں دواں ہو چکی ہو گی جس پر ہمیشہ سے تھی۔ یعنی نتیجہ صفر ہی رہے گا۔ ایسا کب تک ہوتا رہے گا؟

گورمے بیکرز، عمر بلاک، اقبال ٹاون، لاہور بمقابلہ کے ایف سی، نیو یارک

2010-12-15T21:22:00.000+05:00

یہ کہانی دنیا نیوز پر بھی چلی تھی۔

اور یہ ہے مین ہٹن، نیویارک کا کے ایف سی...

ہر خاتون...

2010-12-13T15:09:00.000+05:00

ہر خاتون توقع رکھتی ہے کہ اس کی بیٹی اس آدمی سے بہتر آدمی سے شادی کرے گی جس سے کہ خود اس نے کی اور ساتھ میں یہ یقین بھی رکھتی ہے کہ اس کے بیٹے کو بیوی اس عورت سے بہتر مل ہی نہیں سکتی جو برخوردار کے باپ کو ملی تھی۔

آپ سب کو نیا اسلامی سال 1432 مبارک ہو

2010-12-08T14:36:00.001+05:00

اللہ ہمارے گناہ معاف کرے اور ہمارے لیئے آسانیاں پیدا فرمائے
آمین

سیارہ میں شمولیت دوبارہ

2010-12-01T15:48:00.000+05:00

فری ہاسٹنگ پر منتقل ہونے کے چند روز بعد ایک دن جو اپنے بلاگ کا دیدار کرنے کی خواہش کی تو سب ندارد پایا۔ دل میں فوراْ یہ خیال کوندا کہ لو بھئ یہ وہ گھڑی آن ہی پہنچی جس کے لیے سب خیر خواہوں نے تاکید کی تھی کہ بیک اپ لینے میں کبھی سستی نہ کرنا۔ میں بھا گا بھاگا عثمان اور یاسر کے بلاگز پر پہنچا تو وہاں سب خیریت پائی۔ تب جانا کہ مسئلہ اکراس دی بورڈ نہیں ہے بلکہ صرف میرے بلاگ کے ساتھ ہی ہے۔

پھر جیسا کہ انسانی ذہن کی روش ہے، طرح طرح کے خیالات و خدشات دل میں امنڈنے لگے۔ کوشش کر کے ان کی بریک لگائی کہ بھا ئی تھوڑا رک کے دیکھ تو لو کہ صورتحال واقعی اتنی گھمبیر ہے بھی یا نہیں جتنی کہ دکھائی دے رہی ہے۔تب دل کو یہ سوچ کر قدرے قرار ہوا کہ گاہے بگاہے تو پیڈ ہاسٹنگ سروس بھی تھوڑی دیر کے لیے ڈاون ہو جاتی ہے۔ سو ہو سکتا ہے یہ اسی قسم کی چیز ہو۔

ایسا ہی تھا۔ کچھ دیر کے بعد بلاگ ٹھیک ٹھیک چلنا شروع ہو گیا۔ اوسان بحال ہوئے تو فوراْ Byethost والوں سے دل ہی دل میں ان ناشائستہ خیالات کی معذرت کی جو ان کی بابت ذہن میں آ گئے تھے۔

اور آج ورڈ پریس کے ڈیش بورڈ پر ورژن 3.0.2 کی دستیابی کا مژدو سنایا جا رہا تھا۔ جب آٹو میٹک اپگریڈ کی کوشش کی تو کامیابی نہ ہوئی۔ حیرت ہوئی کہ ایسا کیوں ہو رہا ہے۔ wp-content میں جا کر upgrades نامی ڈائریکٹری کو ڈیلیٹ بھی کر کے دیکھ لیا مگر کچھ نہ ہوا۔ لیکن پھر جب تمام پلگ انز کو deactivate کر کے ورڈ پریس اپگریڈ کرنے کی کوشش کی تو الحمدو للہ پلک جھپکتے میں ہو گیا۔

گویا پیڈ ہاسٹنگ سے فری ہاسٹنگ پر منتقلی کے بعد جملہ معاملات خوش اسلوبی سے سرانجام پا رہے ہیں۔ بس ایک کام ہے جو کہ ہوتا دکھائی نہیں دے رہا اور ہو ہے سیارہ میں بلاگ کی نئے ڈومین کے ساتھ شمولیت۔ ان کو ایک ایمیل کی تھی کہ براہ کرم بلاگ کے یو آر ایل اور فیڈ ایڈریس میں ترمیم کر لیں۔ اس کے علاوہ سیارہ میں شمولیت کا form بھی از سر نو submit کروایا تھا لیکن تا حال شنوائی نہیں ہوئی۔ چلو، دنیا امید پر قائم ہے۔

اردو کے سب رنگ نے ترمیم کی درخواست پر انتہائی جلدی عملدرآمد کر دیا تھا اور اردو بلاگز پر بھی اس ڈومین کی تحاریر نظر آ نا شروع ہو گئی ہیں۔ ان دونوں کا میں ممنون ہوں۔

دیار غیر کو ہجرت

2010-11-21T23:18:00.002+05:00

ڈیلی ایکسپریس میں محترمہ شیریں حیدر کا یہ مضمون پڑھا۔۔۔

کیا واقعی حقیقت ایسی ہی ہے؟

شارع الشیخ زید پر گاڑی چلانا...راہنما ویڈیو

2010-11-11T16:36:00.000+05:00

فری ہاسٹنگ پر ورڈپریس۔۔۔کیونکر؟

2010-11-10T03:23:00.000+05:00

دیکھیئے میں ورڈ پریس پر ہی رہنا چاہتا ہوں مگر paid hosting پر نہیں۔۔۔اب فری ہاسٹنگ پر۔

لیکن ابھی تک سننے میں تو یہی آیا ہے کہ فری ہاسٹنگ والے کسی نہ کسی شکل میں کبھی نہ کبھی کوئی نہ کوئی گڑ بڑ کر ہی دیتے ہیں جس کا نتیجہ بعض صورتوں میں یہ بھی ہوتا ہے کہ اپنے بلاگ سے ہی ہاتھ دھونا پڑ جاتے ہیں۔ لیکن یہ بھی دیکھنے میں آیا ہے کہ کچھ بلاگران نے فری ہاسٹنگ پر اپنا بلاگ ورڈ پریس پر چلایا ہوا ہے اور بظاہر سب ٹھیک ٹھاک ہی چل رہا ہے۔

سو وہ لوگ جو اپنی فری ہاسٹنگ سے مطمئن ہیں براہ کرم راہنما ئی فرمائیں کہ کونسی فری ہاسٹنگ سروس سے استفادہ کیا جا سکتا ہے۔ عین نوازش ہو گی۔
wordpress.org سے ہٹ کر wordpress.pk کو دیکھا ہے لیکن اس میں تھیم میں ترمیم کرنا یا خود سے پلگ انز شامل کرنا ممکن نہیں۔ یہی حال wordpress.com کا ہے۔ اس میں تو پلگ انز کا کوئی سوال ہی نہیں پیدا ہوتا۔ پوسٹ ایڈیٹر میں تو چلو نستعلیق فونٹ کسی طور کر ہی لیں، کمنٹ باکس کا فونٹ کلی طور پر ناقابل ترمیم اور بنا ترمیم قطعئ طور پر ناقابل قبول ہے۔ Blogger.com میں تھیم تو ایڈٹ ہو سکتی ہے مگر کمنٹ باکس میں فونٹ سائز اور فونٹ ٹائپ تبدیل کرنے کی کوئی صورت نہیں ہے۔ یا ہے؟

تو پھر جناب ہے کوئی فری ہاسٹنگ جس پر اپنے پیارے ورڈ پریس پر ہی طبع آزمائی جاری رکھی جا سکے؟

ذہین عورتیں

2010-10-29T15:59:00.000+05:00

مردوں سے برابری کا مطالبہ صرف وہ عورتیں کرتی ہیں جو اپنے آپ کو ذہین سمجھتی ہیں۔جو عورتیں حقیقت میں ذہین ہوتی ہیں وہ ایسا نہیں کرتیں۔

رمضان کے بعد

2010-09-09T22:15:00.000+05:00

ستائیسویں روزے کے بعد عموما ً رمضان کے لیے ہمارا ولولہ ماند پڑ جاتا ہے۔ شاید ایک تو یہ خیال ہوتا ہے کہ بس اب تو روزے ختم ہی سمجھو اور دوسرا دھیان سارا عید کی طرف مائل ہو جاتا ہے۔ لیکن حقیقت یہ ہے کہ جو آخری دو یا تین روزے ہوتے ہیں وہ بھی رمضان کا اسی طرح حصہ ہوتے ہے جیسے کہ پہلے والے باقی روزے۔

اور یہ بھی توجہ طلب بات ہے کہ انتیسویں رات بھی آخری عشرے کی طاق رات ہوتی ہے باقی چار طاق راتوں کی طرح۔ اللہ کے نبی کریم صلی اللہ علیہ وسلم نے لیلتہ قدر کی رات آخری پانچ طاق راتوں میں تلاش کرنے کا حکم دیا ہے اور اس سلسلے میں پانچوں طاق راتوں کی اہمیت برابر ہے۔ رمضان کی انتیسویں رات بھی وہ رات ہو سکتی ہے جو کہ لیلتہ القدر ہو۔

رمضان کے بابرکت مہینے میں جو ہماری ایک تقویٰ والی، اللہ کی اطاعت والی ایک کیفیت بن جاتی ہے رمضان کے عین اختتام پر چاند رات کو بازاروں میں اس کا بالکل الٹ منظر پیش کیا جاتا ہے۔ عید کی شاپنگ کے نام پر ایک عجب ہنگامہ برپا ہوتا ہے۔ اگر صرف خریداری کی ہی بات ہو تو چیزیں تو رمضان سے پہلے والے مہینے میں بھی خرید لی جا سکتی ہیں۔ خیر۔

اس دفعہ تو ویسے بھی دل یہی چاہتا ہے کہ عید سادگی سے ہی منائی جائے۔ سیلاب کے مارے لاتعداد لوگوں کی لاچاری کو روزانہ دیکھ کر دل ملول تو ہوتا ہی ہے نا۔ عید پر ہمیں اللہ کا تہہ دل سے ممنون ہونا چاہیے کہ اس نے ہم میں سے بہت سوں کو سیلاب کی اس آفت سے اپنی امان میں رکھا، عافیت سے روزے رکھنے کی توفیق دی اور عید کا دن دکھایا۔ رمضان سے کوئی دو ہفتے پہلے جو 152 افراد جہاز کے حادثے میں لقمہ اجل بن گئے تھے وہ نہ یہ رمضان دیکھ سکے نہ یہ عید۔ اللہ ان سب کی مغفرت فرمائے۔ آمین۔

رمضان کے بعد دو بہت ثواب کے کام ہیں جو توجہ طلب ہیں. ان میں سے ایک تو کرنا لازم ہے اور دوسرا نفلی عبادت کے زمرے میں آتا ہے ۔ لازم تو ہے فطرانے کی ادائیگی۔ اس کو صدقہ الفطر بھی کہا جاتا ہے۔ اس کا درست اور بر وقت اہتمام کرنا ہر مسلمان پر لازم ہے۔

دوسرا کام ہے شوال کے چھ روزے رکھنا۔ ان کا بہت ثواب ہے۔ یکم شوال کو عید ہوتی ہے۔ اس دن کو چھوڑ کر شوال کے باقی دنوں میں ہر سال یہ چھ روزے رکھ کرخوش نصیب لوگ گناہوں کی مغفرت کے ایک بڑے موقعے سے فائدہ اٹھا تے ہیں۔

جاتےرمضان میں کچھ باتیں

2010-09-06T03:03:00.001+05:00

آئیے ایک تجربہ کریں

مجھے کچھ دن پہلے ایک میل ملی جس میں لکھا تھا کہ آپ ایک پرسکون جگہ پر بیٹھ جائیں۔ پھر تصور کریں کہ اللہ آپ سے فرما رہا ہے مانگو مجھ سے کیا مانگنا ہے، میں تمہیں دوں گا ۔ سو آپ ان تمام چیزوں کا سوچیں جو آپ اس دنیا اور آخرت میں حاصل کرنا چاہتے ہیں۔
ان میں سے اپنی پسندیدہ ترین کچھ چیزوں کا انتخاب کر لیں۔ پھر آخری عشرے کی تمام راتوں میں آپ تسلسل، یکسوئی اور یقین کے ساتھ اللہ سے وہ چیزیں مانگیں۔ اس طرح لازم ہے کہ آپ کی دعا لیلتہ القدر میں آ جائے گی۔ انشاءاللہ۔
اور جو دعا اللہ کے حضور لیلتہ القدر میں پہنچے اس کی قبولیت کے امکانات تو پھر آپ سمجھ ہی سکتے ہیں۔
سو یہ کر دیکھیں۔

اعتکاف بیٹھیں

اعتکاف بیٹھنا ایک زبردست کام ہے جس کے بہت سے روحانی فوا ئد ہیں۔ ایک بہت بڑا فائدہ یہ بھی ہے کے رمضان کے آخری عشرے کی طاق راتوں میں جو یکسوئی اعتکاف کی حالت میں میسر آسکتی ہے وہ ویسے عام حالات میں ملنا مشکل ہوتی ہے۔
اعتکاف کے اختتام پر خاموشی سے گھر لوٹ آنا ہی ٹھیک ہے۔ یہ جو لوگ ہار وغیرہ لے کر اعتکاف سے فارغ ہونے والے کو ایک جشن کی سی کیفیت میں لینے مسجد پہنچے ہوتے ہیں اس قسم کے سلسلے سے گریز ہی کرنا چاہیے۔

جنید جمشید

اس رمضان میں ٹی وی ون چینل سے ہر شام سات بجے جنید جمشید کے درس سننے کا موقعہ ملا۔ بہت کچھ کام کی باتیں بتاتا ہے یہ آدمی۔ اسے اللہ کی باتیں اتنے موثر انداز میں بتاتے دیکھ کر میں تو اکثر یہ سوچ کر حیران ہوتا ہوں کہ اللہ کی شان ہے کہ ایک ایسا نوجوان جو ناچنے گانے میں مگن اپنی زندگی بِتا رہا تھا اسے اللہ نے کیسی ہدایت سے نوازا کہ آج وہی شخص لوگوں کو اللہ کے راستے کی طرف بلا رہا ہے۔ اکثر جنید خود بھی اپنے لہو و لعب اور گمراہی کے شب و روز کا ذکر کرتا ہے جب وہ بتاتا ہے کہ اتنا بڑا انقلاب کیسے اللہ نے اس کی زندگی میں برپا کیا۔

جنید انتہائی سادہ اور سلیس انداز میں اپنے سننے والوں کو اللہ سے تعلق جوڑنے اور اس کی اطاعت کرنے کی دعوت دیتا ہے۔ ہو سکے تو آپ بھی سنیں اسے۔

قرآن تیز تیز پڑھنا

رمضان میں بہت سا قرآن سننے کو مل جاتا ہے ہر رات تراویح کی صورت میں۔ قرآن پڑھنے کا جو ایک بنیادی سلیقہ ہے وہ یہ ہے کہ اس عظیم کلام کو ٹھیر ٹھیر کر اطمینان سے پڑھا جائے۔ اگر تیز پڑھنا بھی ہو تو ایک خاص حد سے زیادہ تیز نہ پڑھا جائے اور اس پاک کلام کا ادب ہمیشہ ملحوظ خاطر رہے۔

لیکن ہم دیکھتے ہیں کہ اکثر مساجد میں تراویح پڑھانے والے قاری صاحبان اس بات کا خیال بالکل نہیں رکھتے اور انتہائی تیز رفتاری سے قرآن پڑھتے چلے جاتے ہیں۔ اس بات کو تراویح پڑھنے والے لوگ نوٹ کر رہے ہوتے ہیں اور ایک دوسرے سے اس خرابی کا ذکر بھی کرتے ہیں لیکن امام صاحب کو اس روش کو چھوڑنے کا نہیں کہتے۔

پھر وہ جوقرآن کو ایک، دو یا تین راتوں میں ختم کرنےکے پروگرام منعقد کیے جا رہے ہوتے ہیں ان میں اللہ کے کلام کو تیز رفتاری سے پڑھنے کے اپنے ہی بنائے ہوئے ریکارڈ توڑے جا رہے ہوتے ہیں۔ اور اوپر سے گمان کیا جا رہا ہوتا ہے کہ یہ سلسلے انتہا ئی روح پرورہیں۔

اگر کوئی پوچھنے کی کوشش کرے کہ یہ والی سیٹنگ اور سلسلے کدھر سے آپ نے لیے جب کہ نبی کریم صلی اللہ علیہ وسلم نے تو رمضان میں باجماعت قیام اللیل صرف تین رات کیا تھا اور اس کے بعد صحابہ اکرام اپنے طور پر گھروں میں یا مسجد میں یہ نماز پڑھتے رہے تو کہا جاتا ہے کہ جی مسلمان صدیوں سے یہ نماز یونہی پڑھتے چلے آ رہے ہیں۔

آپ کہیں اچھا جی لیکن رسول اللہ صلی اللہ علیہ وسلم کے عمل سے تو جو ثابت ۔۔۔۔تو جواب ملتا ہے
” بس چُپ۔ جس بات کا پتا نہ ہو وہ نہیں پوچھتے۔“

مساجد میں افطاری

2010-08-13T23:35:00.000+05:00

جس شام رمضان کا چاند نظر آیا اس رات مسجد میں نمازیوں سے بھری ہوئی صفوں کی تعداد ڈبل ہو گئی۔ اگلے دن مغرب کے وقت یہ تعداد واضح طور پر اوربھی بڑھ گئی۔ مسجدوں میں افطار کا اہتمام بھی ہوتا ہے۔ اس لیے مغرب کے وقت خاصی گہماگہمی ہو جاتی ہے۔

ایک خاطرخواہ تعداد اس رونق میں ان لوگوں کی بھی ہوتی ہے جو صرف افطاری سے مستفید ہونے کی نیت سے آئے ہوتے ہیں اور ان کے پروگرام میں افطاری کے بعد مغرب کی نماز میں شرکت کرنا شامل نہیں ہوتا۔ یہ لوگ کھا پی کر اور کچھ مزید اشیاء خورد و نوش شاپر میں ہمراہ لے کر جماعت کھڑ ی ہونے سے پہلے پہلے واپسی کا قصد کرتے ہیں ۔

اکثر مساجد میں تو ان کی یوں واپسی میں کوئی خلل نہیں ڈالا جاتا لیکن بعض مساجد میں ذرا حساس طبع قسم کے انتظامیہ والے ان کو یوں نہیں لوٹنے دیتے اور ان کو گفتگو اور ہلکے ہلکے دھکوں وغیرہ کی مدد سے مسجد کے اندر بھیج دیتے ہیں کہ آپ باجماعت نماز پڑھے بغیر یوں نہ جائیں۔

اب ان بیچارے غریب لوگوں کے لیے جو محض پیٹ کے ہاتھوں مجبور ہو کر مسجد کی افطار پارٹی میں آ نکلے تھے ایک عجیب نہ جاۓ ماندن نہ پاۓ رفتن والی کیفیت ہو جاتی ہے۔ ان میں سے اکثر کا روزہ نہیں بھی ہوتا۔ اور بعض صورتوںمیں گمان غالب ہے کہ بیچ میں کچھ غیر مسلم بھی شکم پری کے چکر میں آن پھنستےہیں۔

مسجد کےھال میں پہنچ کر یہ مجبور کیا گیا گروہ پچھلی ترین صفوں میں کھڑا ہونے کو ترجیح دیتا ہے۔ دوران نماز ان کی کیفیت اور حالت ویسی ہی ہوتی ہے جیسی رش سے بھری سڑک پر لرنر لائسنس والے ڈرائیور کی ہوتی ہے۔لیکن چیلنج سے بھرپور یہ صورتحال ان کے حوصلے اس طور پست نہیں ہونے دیتی کہ وہ آنے والے بقیہ دنوں میں نماز سے عاری افطاری میں شمولیت کا ارادہ ترک کر دیں۔

سو رونقیں لگی رہتی ہیں۔

قرآن ایکسپلورر اور ایک اور لنک

2010-08-13T04:14:00.000+05:00

اس ویب سائٹ کو ملاحظہ فرمائیں اور وہاں ٖLAUNCH QURAN EXPLORER کے سرخ بٹن کو کلک کریں۔

اس سائٹ میں اور بھی بہت کچھ فائدہ مند پائیں گے آپ انشاء اللہ۔

اور یہ ایک اور لنک۔۔۔ان لوگوں کے لیے دلچسپی کا باعث ہے جو رمضان میں سنجیدگی سے اللہ کی رضا کے لیے کوشاں ہیں۔

ہر سال رمضان میں۔۔۔

2010-08-12T01:16:00.000+05:00

آج سعودی عرب اور امارات میں 2010 کے رمضان کا پہلا روزہ رکھا گیا۔ اب سے تھوڑی دیر پہلے پاکستان میں بھی رمضان کا چاند نظر آگیا ہے سو کل ہم بھی پہلے روزے سے ہوں گے۔انشاء اللہ۔

اللہ کا بڑا احسان ہے کہ اس نے ایک مرتبہ پھر زندگی میں موقعہ عطا فرمایا کہ ہم رمضان کی برکتوں سے مستفید ہو سکیں۔پچھلے چند ہی ہفتوں میں سیلاب میں، جہاز کے حادثے میں، فسادات اور قتل و غارت میں کتنے ہی لوگ زندگی سے ہاتھ دھو بیٹھے۔ عام حالات میں بھی کچھ پتا نہیں ہوتا کب کس کی موت آجائے۔ ایسے میں ایک اور ماہ رمضان کا مل جانا بہت بڑی نعمت ہے۔ اس بات پر اللہ کا شکر کرتا ہوں۔

ہر سال جب رمضان شروع ہوتا ہے تو میں ارادہ کرتا ہوں کہ اس مرتبہ رمضان کی اس نعمت سے بھر پور فائدہ اٹھانے کی سچی کوشش کروں گا۔ فر ض عبادات تو کروں گا ہی ساتھ میں ڈھیر سی نفلی عبادات بھی کروں گا۔ لغویات میں وقت بِتانے کی بجائے بہت سا قرآن پڑھوں گا۔ ساتھ میں اللہ کے اس کلام میں جو عظیم الشان رب کا پیغام ہے اس کو بھی سمجھنے کی کوشش کروں گا۔

اور صرف یہی نہیں بلکہ ساتھ میں جن جن کاموں سے اللہ کریم نے منع فرمایا ہے ان سے ہر صورت اجتناب کروں گا چاہے میرے دل کو وہ کام کتنے ہی پر لطف اور سرور انگیز لگتے ہوں۔ نیز یہ کہ دوسرے انسانوں سے بات اور معاملات کرتے وقت ان سے برداشت، نرمی اور رواداری سے پیش آوں گا۔ نا مناسب الفاظ، زبان کی تیزی یا آواز و لہجہ کی سختی سے کسی کا دل نہیں توڑوں گا۔ علاوہ ازیں اس بات کو نہیں بھولوں گا کہ قرآن میں میں اللہ نے شرک اور فحش کاموں کی ہر ہر شکل سے بچنے کا ہمیں حکم دیا ہے۔ اور یہ کہ قرآن کے مطابق جنت نیک اعمال کے بدلے ہی میں ملنی ہے۔

یہ سب اور بہت کچھ۔ نہ جانے کیا کیا ارادے کرتا ہوں۔ اور یہ بھی سوچتا ہوں کہ رمضان میں تو شیطان قید کر دیا جاتا ہے لہذا نیکی کے ان تمام ارادوں کو عملی جامہ پہنانے میں مجھے چنداں مشکل نہیں ہو گی۔

اور پھر جب رمضان گزر جاتا ہے تو یہی احساس دل میں رہ جاتا ہے کہ اس مرتبہ بھی اعمال کی درستگی کا وہ اہتمام جو کہ میں کر سکتا تھا رمضان میں وہ کر نہیں سکا۔ شیطان تو مقید تھا تو پھر یہ شاید ہمارا نفس ہوتا ہے جو خیر کی طرف نہیں بڑھنے دیتا اور ہر اس کام کو جس سے کائنات کے مالک نے ہم کو منع فرمایا ہوتا ہے اسے نہایت دلکش بنا کر ہمیں دکھاتا ہے۔

اللہ ہم پر رحم فرمائے۔ آمین۔

عجب آزادمردتھا

2010-07-17T22:54:00.000+05:00

ٹوبہ ٹیک سنگھ میں ایک نوے سالہ ملنگ کو اس کے مریدوں نےڈھول ڈھمکوں کے ساتھ قبر میں اتارا۔

بابا دلدار حسین نے اپنے مریدوں اور چاہنے والوں کو وصیت کی تھی کہ اس کی موت کے بعد اس کی میت کو ڈھول اور باجوں کے شور میں تدفین کے لے جایا جائے۔

مرحوم کی میت پر کرنسی نوٹ بھی نچھاور کیے گئے۔

اور سٹاک مارکیٹ میں لوگ باگ تیزی مندی کی پیشن گوئی کیسے کرتے ہیں

2010-07-17T01:51:00.000+05:00

خزاں کا موسم تھا۔ ایک ریڈ انڈین قبیلے کے لوگوں نے اپنے نئے سردار سے پوچھا کہ موسم سرما اس مرتبہ شدید ہو گا یا پھر اس دفعہ سردی کم پڑے گی۔ اب کیونکہ وہ ایک جدید زمانے کا ریڈ انڈین سردار تھا اس لیے اس کو یہ ملکہ حاصل نہ تھا کہ قبل از وقت آنے والے موسم کا اندازہ کر سکے۔ تاہم “سیف سائڈ” پر رہتے ہوئے اس نے اپنے قبیلے کے لوگوں کو یہی کہا کہ اس مرتبہ شدید سردی پڑنے کا امکان ہے لہذا لازم ہے کہ وہ لوگ سخت موسم کا مقابلہ کرنے کے لیے ابھی سے کافی مقدار میں لکڑی اکٹھی کرنا شروع کر دیں۔

اب چونکہ وہ سردار ایک سمجھ دار آدمی تھا سو کچھ دنوں بعد اس کو خیال آیا کہ محکمہ موسمیات والوں کو بھی فون کر کے ذرا آنے والے موسم کا پوچھ لیا جائے تو بہتر ہے۔ اس کے سوال کے جواب میں فون پر محکمہ والوں نے اسے بتا یا کہ اس مرتبہ امکان ہے کہ سردی زیادہ پڑے گی۔

یہ جان کر اس سردار نے اپنے قبیلے والوں کو کہا کہ ضروری ہے کہ اس موسم سرما کو گزارنے کے لیے وہ لوگ اور زیادہ لکڑی اکٹھی کر لیں۔ سو اس گاوں کے لوگوں نے اور زور شور سے لکڑیاں کاٹ کاٹ کر ذخیرہ کرنا شروع کر دیں۔

کوئی ہفتہ بھر بعد سردار نے پھر محکمہ موسمیات کو فون کیا اور استفسار کیا کہ کیا اس مرتبہ سردیاں شدید ہوں گی؟ تو انہوں نے اسے جواب دیا کہ ہاں اس مرتبہ سردیاں لازم شدید ہوں گی۔

سردار نے پھر سے اپنے لوگوں کو اکٹھا کیا اور حکم دیا کہ دستیاب لکڑی کا ہر ہر ٹکڑا اکٹھا کر کے رکھ لیا جائے کیونکہ اس مرتبہ موسم سرما میں بہت زیادہ سردی پڑنی ہے۔

کوئی دو ہفتوں کے بعد اس سردار نے ایک مرتبہ پھر محکمہ موسمیات کے دفتر فون کیا اور پوچھا کیا آپ کو پکا یقین ہے کہ اس مرتبہ سخت سردی پڑنے والی ہے۔جواب ملا کہ بالکل پکی بات ہے کہ اس سال سردی کے پہلے ریکارڈ بھی ٹوٹ جائیں گے۔سردار نے پوچھا آخر آپ کو اس بات کا اتنا پکا یقین کیونکر ہے۔

محکمہ موسمیات والے آدمی نے جواب دیا اس لیے کیونکہ اس مرتبہ ریڈ انڈین لوگ پاگلوں کی طرح لکڑی ذخیرہ کر رہے ہیں۔

کیا واقعی سٹاک مارکیٹ یوں چلتی ہے؟

2010-07-15T21:47:00.000+05:00

ایک مرتبہ ایک گاوں میں دو آدمی آئے اور ان میں سے ایک نے گاوں والوں کے سامنے اعلان کیا کہ وہ بندر خریدنا چاہتا ہے۔ جو کوئی بھی اس کا پاس بندر پکڑ کر لائے گا وہ اسے دس ڈالر فی بندر کے حساب سے ادائیگی کرے گا۔
گاوں والے بہت خوش ہوئے کیونکہ قریبی جنگل میں بندروں کی بھر مار تھی اور انہیں لگا کہ وہ تو یوں اچھی رقم بنا لیں گے۔

سب لوگ جا کر بندر پکڑ پکڑکر لاتے رہے اور وہ آدمی ان سے دس ڈالر فی بندر کے حساب سے بندر خریدتا رہا۔ حتی کہ قریبی جنگل میں بندر اب تقریباً ختم ہونا شروع ہو گئے۔ گاوں والو ں نے بھی بندر پکڑنے کی کوشش اب ترک کر دی۔

تب اس آدمی نے اعلان کیا کہ اب سے وہ گاوں والوں سے بندر بیس ڈالر فی بندر کے حساب سے خریدے گا۔ اس سے گاوں والوں میں ایک نیا ولولہ پیدا ہوا اور انہوں نے ازسرنو مزید بندر ڈھونڈنے اور لانے کی سعی شروع کر دی۔ اب کے ان کے بندر بیس ڈالر فی بندر کے حساب سے فروخت ہوتے رہے۔ لیکن جلد ہی اور بندر تلاش کرنا بہت ہی مشکل ہو گیا۔

اب اس آدمی نے نئی قیمت نکالی: آج سے بندر پچیس ڈالر فی بندر کے حساب سے خریدے جائیں گے۔ کچھ گاوں والوں نے پھر سے ہمت کی مگر اب کے بندر پکڑنا تو درکنار،کسی بندر کا نظر آ جانا بھی بڑی بات تھی۔ علاقے کے تمام بندر اس آدمی کے پاس بیچے جا چکے تھے۔

پھر ایک صبح اس آدمی نے اعلان کیا کہ اب وہ گاوں والوں سے بندر پچاس ڈالر فی بندر کے حساب سے خریدے گا لیکن چونکہ اس کو کسی کام سے شہر جانا پڑ گیا ہے لہذا اس کی غیر موجودگی میں اس کا اسسٹنٹ اس کی جگہ اس نئی قیمت پر بندروں کی خریداری جاری رکھے گا۔

یہ کہہ کر وہ شخص اس گاوں سے چلا گیا۔

اب پچاس ڈالر فی بندر قیمت تو ایسی تھی کہ گاوں کے ہر بندے کا جی للچا رہا تھا۔ مگر کچھ کیا نہیں جا سکتا تھا کیونکہ قرب و جوار سے اور بندر اب پکڑ کر لانا قطعاً ممکن نہ رہا تھا۔ جتنے بھی بندر تھے وہ سب اب تک اس آدمی کو بیچے جا چکے تھے جنہیں اس نے وہاں پڑے ایک پنجرے میں بند کر رکھا تھا۔

ایسے میں اس آدمی کے اسسٹنٹ نے گاوں والوں کو ایک تجویز پیش کی۔ اس نے کہا دیکھو اگر تم اس آدمی کو مزید بندر پچاس ڈالر فی بندر کے حساب سے فروخت کرنا چاہتے ہو لیکن اب مزید بندر دستیاب نہیں ہیں تو اس کا ایک حل ہے۔ یہ جو بندر سامنے پنجرے میں بند ہیں جو میرے باس نے تم سے خریدے تھے، یہ میں تم کو پینتیس ڈالر فی بندر کے حساب سے فروخت کر سکتا ہوں۔ تم چاہو تو مجھ سے اس دام میں یہ تمام بندر خرید لو اور جب میرا باس شہر سے واپس آ جائے تو تم یہ سب بندر اس کو پچاس ڈالر فی بندر کی قیمت پر فروخت کر دینا۔

گاوں ولوں نے جانا کہ یہ تو جی وارے نیارے ہو گئے۔ وہ سب اپنے گھروں کو گئے اور اپنی تمام جمع پونجی لے کر آ گئے۔ انہوں نے وہ تمام کے تمام بندر پینتیس ڈالر فی بندر کی ادائیگی کر کے خرید لیے۔

اس دن کے بعد نہ تو انہیں کبھی وہ پہلے والا آدمی نظر آیا اور نہ ہی اس کا اسسٹنٹ۔ بس ہر طرف بندر ہی بندر نظر آتے تھے۔

کہتے ہیں سٹاک مارکیٹ یوں چلتی ہے۔

کیا واقعی یوں ہی چلتی ہے سٹاک مارکیٹ یا کچھ اور بھی محرکات ہوتے ہیں حصص کی قیمتوں کے اتار چڑھاو کے پیچھے؟ آپ کا کیا تجربہ یا مشاہد ہ ہے؟

بقیہ قصہ ایک حلالے کا

2010-07-15T00:38:00.002+05:00

اب وہ مصری شوہر تو قائل تھا اس بات پر کہ طلاق کے بعد اب ان دونوں کے دوبارہ ازدواجی بندھن میں بندھنے کا واحد رستہ یہ حلالہ ہی ہے۔ تاہم وہ خاتون اس بارے میں کچھ شش و پنج میں تھی۔ لیکن آخر کار کچھ ایسا ہوا کہ وہ بھی اس بات کو مان ہی گئی۔ جب یہ ہو گیا تو اس آدمی نے اب بلڈنگ کے چوکیدار کو آمادہ کرنے کی ٹھانی۔

وہ چوکیدار ایک درمیانی عمر کا انڈین مسلمان تھا اورمعاشی حالات کی وجہ سے اب تک غیر شادی شدہ تھا۔ وہ ایک خاموش طبع شخص تھا جو اپنے کام میں مصروف رہتا تھا۔ بلڈنگ کے مکینوں نے شاذ و ناذر ہی اسے بے کار کی گپ شپ وغیرہ کرتے دیکھا تھا۔ بیشتر وقت وہ بلڈنگ کی دیکھ بھال اور صفائی ستھرائی میں ہی مگن رہتا تھا۔

سو اس کے پاس جب وہ مصری یہ تجویز لے کر آیا کہ وہ اس کی سابقہ بیوی سے شادی کر لے تو ظاہر ہے کہ وہ بھونچکا رہ گیا۔ اورجب اسے وضاحت سے بتا یا گیا کہ اس شادی کا اصل مقصد کیا ہے تو اس نے ان کے منصوبے کا حصہ بننے سے صاف انکار کر دیا ۔

لیکن وہ آدمی بھی اس بات پر کمر بستہ تھا کہ چوکیدار اس کی سابقہ بیوی سے شادی کر ہی لے لہذا وہ کچھ دن کے بعد پھر سے اس کے پاس پہنچ گیا اور اس کو اس کی خدمات کے عوض ایک اچھی رقم کی پیشکش کی۔ساتھ میں یہ بھی کہا کہ اگر یہ رقم کم ہے تو وہ اور زیادہ بھی دے سکتا ہے۔ اس نے چوکیدار کو یہ یقین دہانی بھی کروائی کہ کسی اور کو اس سارے معاملے کی کانوں کان خبر نہ ہو گی۔

سو آخر کار وہ چوکیدار راضی ہو ہی گیا۔

شادی کسی نہ کسی طور سرانجام پا ہی گئی اور چوکیدار خاموشی سے اس خاتون کو اپنے چھوٹے سےکمرے میں لے گیا۔ اس شادی کا نہ تو کوئ باقاعدہ اعلان ہوا، نہ کوئی تقریب منعقد ہوئی۔ نہ کوئی مہمان تھے نہ ہی کوئی مبارکبادوں کا سلسلہ بنا۔

گو کہ منصوبے کے مطابق اس چوکیدار نے اپنی بیوی کو اگلی صبح طلاق دینا تھی لیکن ایسا ہوا نہیں۔ آخر جب چوبیس گھنٹے گزر گئے تو سابقہ شوہر صاحب کو شدید بےچینی ہونے لگی۔ سو اضطراب کے مارے اس بیچارے نے جا کر چوکیدار کا دروازہ پیٹا اور پوچھا کہ ابھی تک اس نے اس خاتون کو طلاق کیوں نہیں دی۔ جواب میں چوکیدار نے اس کو یقین دہانی کروائی کہ وہ تو طلاق دینے پر بالکل تیار ہے لیکن وہ بیوی طلاق سے انکاری ہے۔ ظاہر ہے اس مصری جوان کو چوکیدار کی اس بات کا ایک لمحے کے لیے بھی یقین نہیں آیا۔ وہ مان ہی نہیں سکتا تھا کہ وہ عورت اپنے محبوب یعنی اس کو چھوڑ کر اس چوکیدار کی بیوی بن کر رہنا چاہتی ہے۔

لیکن چوکیدار ہی کی بات درست نکلی۔ اس خاتون نے اپنے سابقہ شوہر کو بتایا وہ اس کو ہر گز قابل بھروسہ نہیں سمجھتی کیونکہ وہ بہت خود غرض آدمی ہے اور ساتھ میں انتہائی غصیلا اور بد مزاج بھی۔ اسی لیے اس نے فیصلہ کر لیا ہے کہ وہ اب ایسے آدمی کے ساتھ رہے گی جو اس کی عزت کرتا ہے۔ اس نے اپنے سابقہ شوہر کو بتایا کہ اسے اندیشہ ہے کہ اگر وہ پھر سے اس سے شادی کر لے گی تو کسی دن پھر غیظ و غضب اور طیش کے عالم میں وہ دوبارہ اس کو طلاق دے ڈالے گا۔

اس بلڈنگ میں تمام لوگ اس کہانی سے واقف ہیں کہ کسطرح ایک عام، سادہ سے چوکیدار کی شادی ایک جوان، پڑھی لکھی خاتون سے ہو گئی۔ اب ایک سال ہونے کو ہے اور وہ دونوں اکٹھے ہی رہ رہے ہیں۔

اور وہ مصری شہزادہ۔۔۔وہ اس بلڈنگ کوچھوڑکر جا چکا ہے۔
×××××××××××××××××××××××××××××××××××××××××××××××

یہ واقعہ میں نے نادیہ کے بلاگ پر پڑھا۔ واقعہ لکھنے کے بعد انہوں نے جہاں اس بارے میں اپنے خیالات کا اظہار کیا ہے وہاں ایک ایسے آدمی کا بھی ذکر کیا ہے جس نے پشاور سے حلالہ کے لیے اپنی خدمات ضرورت مند لوگوں کے لیے پیش کی ہیں۔ یہ 32 سالہ صاحب اپنے اشتہار میں فرماتے ہیں:

حلالہ اعتماد کے ساتھ۔۔۔وہ جوڑے جو دوبارہ اکٹھے ہونا چاہتے ہیں اور حلالہ کے خواہشمند ہیں وہ بہت اعتماد سے مجھ سے رابطہ کریں۔ ہر بات صیغہ راز میں رکھی جائے گی۔ یہ محض ثواب کی خاطر ہے، اور کوئی غرض نہیں۔ آپ کوصرف رہائش اور ٹکت کا انتظام کر نا ہو گا۔ اور پھر بس مجھے دعاوں میں یاد رکھیے گا۔

اشتہار کے نیچے ان صاحب نے ایک تصویر بھی دی ہوئی ہے۔

پوسٹ کے آخر میں نادیہ نے اس ویڈیو کا لنک بھی دیا ہے جو ان لوگوں کے لیے دلچسپی کی حامل ہے جو تین طلاق اور حلالہ کی شرعی حیثیت سمجھنے میں دلچسپی رکھتے ہیں:

اس ویڈیو کے چھ حصے ہیں۔

قصہ ایک حلالے کا

2010-07-13T23:44:00.000+05:00

یہ واقعہ متحدہ عرب امارات کی ایک رہائشی بلڈنگ میں وقوع پذیر ہوا جب تقریباً تین سال پہلے اس بلڈنگ میں ایک نوبیاہتا مصری جوڑا رہنے کے لیے آیا۔ یہ دونوں مصر سے کچھ عرصہ قبل اپنی اپنی نوکری کے سلسلے میں امارات آئے تھے۔ یہاں ان کی پہلی ملاقات مشترکہ دوستوں کی بدولت ہوئی۔ دونوں ایک دوسرے کی محبت میں گرفتار ہوئے اور پھر شادی کر لی۔ وہ ایک اچھے قد کاٹھ کا وجیہ آدمی تھا اور خاتون بھی ایک خوبصورت گڑیا ہی لگتی تھی۔

دوسرے شادی شدہ لوگوں کی طرح ان دونوں میں بھی اختلافات، بحث، جھگڑا ہو جاتا تھا۔ حتیٰ کہ ایک دن ایسا بھی آیا کہ ان دونوں کو لگا کہ انکی جھک جھک اب اتنی بڑھ گئی ہے کہ اب مفاہمت کا کوئی امکان نہیں۔سو انہوں نے طلاق کا رستہ اپنا لیا۔ طلاق کے بعد بھی وہ اسی بلڈنگ میں رہائش پذیر رہے لیکن اب الگ الگ اپارٹمنٹس میں۔

تاہم زیادہ عرصہ نہ گزرا کہ موصوف پہ آشکارا ہوا کہ جناب اس خاتون کے بغیر نہیں رہ سکتے۔ اس خاتون کی عدم موجودگی میں ان صاحب کو اپنے اندر میں ایک خلا محسوس ہونے لگا۔ اس آدمی کو زندگی اب بے معنی لگنا شروع ہو گئی۔ سو ایک دن وہ باہر اس عورت سے ملا اور اس کے لئے اپنی محبت کا اعتراف کر ڈالا۔ اس نے اس کو شادی کی ایک مرتبہ پھر پیشکش کی جو کہ اس خاتون نے اب کی بار بھی اشکبار آنکھوں کے ساتھ بخوشی قبول کر لی۔

بس صرف ایک مسئلہ تھا: شریعت کے مطابق ان کے لیے یہ ممکن نہ تھا کہ باقاعدہ طلاق ہو جانے کے بعد بس یونہی دوبارہ شادی کر لیتے۔ طلاق ایک ناخوشگوار چیز ہے اس لیے اس کے قواعد و ضوابط بھی ٹھوس قسم کے رکھے گئے ہیں تا کہ مرد حضرات جب جی میں آئے منہ اٹھا کر بیوی کو طلاق دینے نہ دوڑ پڑیں بلکہ اس انتہا ئی اقدام سے پہلے سو مرتبہ سوچیں، غور کریں۔

پھر ہوا یوں کہ ان دونوں کو کسی ناعاقبت اندیش نے حلالہ کا رستہ دکھایا۔ بتانے والے نے عارضی شادی کا یہ نسخہ ان دونوں کو اس طور بتایا کہ انہیں لگا کہ یہ توان کے معاملے کا بہت ہی سہل اور سیدھا سادہ حل ہے۔ اس جاہل نے اس آدمی کو کہا بس تم کوئی ایسا شخص ڈھونڈ لاو جو اس عورت سے نکاح کر لے- حقِ زوجیت ادا کرنے کے بعد وہ شخص اس عورت کو طلاق دے دے گا۔ بس پھر تم اس عورت سے دوبارہ نکاح کر لینا، اتنی سی بات ہے۔

وہ دونوں بیچارے دوبارہ ایک دوسرے کی زندگی کا ساتھی بننے کے اس قدر آرزومند تھے کہ انہیں لگا کہ یہ ہی ان کی مشکل کا بہترین مداوا ہے۔ اپنی بے تابی میں وہ اس حقیقت کو بھی نظر انداز کر گئے کہ اس قسم کی عارضی شادی کی شریعت میں واضح اور شدید مذمت کی گئی۔

سو وہ اب ایک ایسے آدمی کی تلاش میں تھے جو اس خاتون سے عارضی طور پر شادی کر سکے۔ اس میں اب اصل مسئلہ یہ تھا کہ ایک ایسا شخص ڈھونڈا جائے جو اپنی بات کا پکا ہو اور وعدے کے مطابق اگلی صبح اس عورت کو واقعی طلاق دے دے۔ ایسا آدمی مل جانا کوئی آسان نہ تھا۔ اسی لیے انہیں اس تلاش میں خاصا وقت لگ گیا۔ لیکن آخر کار ان کو اپنا مطلوبہ بندہ مل ہی گیا جو ان کے منصوبے کے لیے بہت مناسب تھا۔

اور وہ تھا ان کی بلڈنگ کا چوکیدار۔
جی وہی المشہور ناطور۔

آگے کیا ہوا۔۔۔یہاں پڑھیے

عجیب مصیبت

2010-07-13T18:07:00.000+05:00

یہ ہاسٹنگ کمپنی ہے جو میری اس کو نہ جانے کیا ہو گیا ہے۔ آج صبح پہلے تو سائٹ ہی ڈاون تھی۔ اب جو چلی ہے تو میری تازہ ترین پوسٹ بمعہ تبصرہ جات غائب ہے۔۔۔جی جی وہی والی جو کل رات شائع کی تھی نا۔۔۔حلالے کا قصہ جو تھا۔

عجیب مصیبت ہے!

ان کے سامنے جو اپنا رونا رویا ہے تو یہ جواب آ گیا ہے:

Due to services affected at old datacentre we immidiatley moved your site to high config new server at new datacentre. We took this action to provide you better services in future. We are sorry for inconvinience but we took this action to provide better services in future

اب کوئی پوچھے کہ جب ڈیٹا لاس ہو رہا ہے تو یہ کہاں کی بیٹر سروس ہے؟؟؟

آپ کا کیا خیال ہے؟

2010-06-28T13:28:00.000+05:00

ایک کامیاب شخص جو ایک بڑے شہر کے ایک بڑے ادارے میں ایک اونچے عہدے پر فائز تھا، ایک دور دراز مقام پر کچھ دن چھٹیاں گزرانے گیا۔ اس چھوٹے سے قصبے میں ایک دن اس نے دیکھا کہ ایک شخص اپنے چھوٹے سے گھر کے باہر دن کے وقت بیٹھا اونگھ رہا ہے۔ یہ اسے بہت عجیب لگا۔ اس نے اس اونگھتے ہوئے شخص سے جا کر کہا،“میاں تم شہر جا کر کوئی نوکری کیوں نہیں کرتے؟”

اونگھتے شخص نے ایک آنکھ کھول کر پوچھا،“کیوں؟”

کامیاب شخص بولا،“اس لیے کہ آج کل شہر میں اچھے پیسے بن جاتے ہیں۔ تم خاصی رقم کما لو گے”۔

بیٹھا ہوا شخص پھر بولا،“کیوں؟”

پہلے شخص نے اسے سمجھایا،“ دیکھو اگر تم وہاں اچھی رقم کمانا شروع کر دو گے تو کچھ عرصے میں اس قابل بھی ہو جاو گے کہ ایک مناسب رقم پس انداز کر سکو۔ یہ جمع شدہ رقم آہستہ آہستہ اتنی ہو جائے گی کہ تم اسے کسی مناسب جگہ انویسٹ کر سکو گے۔اس سے کچھ سالوں میں تمہاری آمدن کا ایسا سلسلہ بن جائے گا کہ جب تم ریٹائر ہو جاو گے تو تم کو کام کرنے کی ضرورت نہ ہو گی۔”

اس پر اونگھتے ہوئے شخص نے دونوں آنکھیں کھول لیں اور بولا،“ کام تو میں اب بھی نہیں کر رہا”

آپ کے خیال میں ان دونوں میں سے کس شخص کی سوچ درست تھی؟

ورڈ پریس 3.0 آ گیا

2010-06-19T00:59:00.000+05:00

اس ویڈیو میں ورڈ پریس کا میٹ ورڈپریس کے بارے میں بہت کچھ بتا رہا ہے.

ورڈ پریس3.0 ڈاونلوڈ

ورڈ پریس ورژن تھری- ایک جائزہ

منہ دیکھنے

2010-06-02T14:58:00.000+05:00

کچھ عرصہ قبل اظہر عابدی کا ایک انٹرویو نظر سے گزرا جس میں انہوں نے اپنے ناول Twilight کے بارے میں بات کی۔ اظہر آسٹریلیا میں رہتے ہیں۔ ان کا یہ ناول کراچی میں رہنے والی ایک ایسی خاتون کے بارے میں ہے جس کے بیٹے نے ایک آسٹریلوی عورت سے شادی کر لی۔

عابدی کہتے ہیں کہ وہ ان ماؤں کے بارے میں لکھنا چاہتے تھے جن کے بچے ان کی آنکھوں کے سامنے بڑے ہوتے ہیں اور پھر گھر چھوڑ کر چلے جاتے ہیں۔ ان کے اس ناول کی تحریک یہی خیال بنا کہ نوجوان لوگ اپنے والدین کو تنہائی کے حوالے کر کے خود دور دراز کے ممالک میں پکے جا بستے ہیں۔

خود عابدی نے ایک آسٹریلوی لڑکی سے شادی کی جبکہ ان کے والدین کو امید تھی کہ وہ شادی کے لیے اپنے لوگوں ہی میں سے کسی کا انتخاب کریں گے۔ شادی کے بعد وہ پاکستان میں نہ رہ سکے کیونکہ ان کی بیوی یہاں نہیں رہنا چاہتی تھی۔ اس کی خواہش کے مطابق عابدی اس کے ہمراہ آسٹریلیا منتقل ہو گئے۔ ان کے والدین پیچھے پاکستان میں رہ گئے۔ لیکن دور چلے جانے کے باوجود عابدی کے دل میں اپنے والدین کے لیے ایک احساس ذمہ داری ہمیشہ رہا۔

عابدی کہتے ہیں کہ بعد ازاں وہ جب بھی کچھ سال کے وقفے سے وطن واپس آتے تو اپنے والدین کو پہلے سے کچھ زیادہ بوڑھا اور کمزور پاتے۔ آسٹریلیا میں رہتے ہوئے ہمیشہ ایک خدشہ ان کے دل کی گہرائی میں کہیں موجود رہتا کہ کسی دن ایک فون کال آئے گی جس میں ان کو یہ سننا ملے گا کہ ان کے والدین میں سے کوئی ایک فوت ہو گیا ہے۔اس قسم کے اندیشوں میں لپٹا ہوا ایک سوال اکثر ان کی سوچوں میں سر ابھارتا رہتا کہ کیا انہو ں نےاپنے وطن میں سکونت ترک کر کے اور ایک غیر ملکی سے شادی کرکے درست فیصلہ کیا تھا۔

عابدی کا یہ انٹرویو پڑھنا ایک اداس کر دینے والا تجربہ تھا۔ بہت سے لوگ جوانی میں اپنے گھر سے دور کسی اور ملک میں مستقل جا بسنے کا فیصلہ کر لیتے ہیں۔ لیکن وہ اس احساس تنہائی کا قطعاً اندازہ نہیں کر سکتے جو اپنی اولاد سے یوں جدائی کے نتیجے میں انکے والدین کو ہوتا ہے۔ اسی طرح ان کو اس دکھ کا اندازہ بھی نہیں ہوتا جو ان کے والدین کو تب ہوتا ہے جب یہ لوگ پردیس میں کسی غیر ملکی سے شادی کر لیتے ہیں۔

ساری زندگی تو یہ لوگ والدین سے دور گزار دیتے ہیں لیکن جب یہی والدین آخر میں فوت ہو جاتے ہیں تو ان کی میت کی تدفین رکی رہتی ہے۔ پتا چلتا ہے کہ ان کا وہ بیٹا جو سالوں پہلے ان کو چھوڑ کر کسی اور دنیا میں جا بسا تھا اب 12000 کلومیٹرز کا سفر طے کر کے ان کا منہ دیکھنے آ رہا ہے۔ اس کا انتظار کیا جا رہا ہے۔

دوسری طرف ایسے لوگ بھی دیکھے گئے ہیں جو بہتر زندگی کے گمان میں والدین سے دور کہیں سمندر پار رہنے چلے تو گئے لیکن پھر انہوں نے اپنے فیصلے پر نظر ثانی کی۔ سوچا اور جانچا کہ کیا ایک ایسی زندگی کا انتخاب درست ہے جس میں آسانیاں اور آسائشیں تو ہیں لیکن ساتھ میں ایک کبھی نہ ختم ہونے والا احساس زیاں اور پچھتاوا بھی ہے۔ اور پھر وہ لوٹ آئے۔

منہ لگی بوتل

2010-05-31T19:30:00.000+05:00

یہ تو اکثر ہی سنا ہے کہ اگر آپ ہوٹلوں کے باورچی خانوں کی حالت زار، وہاں گندگی و غلاظت کا عالم ایک دفعہ خود دیکھ لیں تو آپ ہوٹلوں میں کھانا کھانا ترک کر دیں۔

اچھا جی یہ تو ہو گیا گھر سے باہر کھانا کھانا یا نہ کھانا۔

کسی کے گھر میں جا کرپانی پینے کے بارے میں آپ کیا کہتے ہیں؟

تقریباً ہر گھر میں گھر کے چھوٹے بڑے افراد یہی کرتے ہیں کہ پیاس لگی تو گزرتے گزرتے فریج کھولا، پانی کی بوتل نکالی، منہ کو لگائی، غٹا غٹ کچھ پانی پیا اور بوتل واپس فریج میں۔

مہمان آئے۔ ان میں سے کسی نے پانی مانگا یا کھا نے کے ہمراہ انہیں پانی دینے کا مرحلہ آیا تو وہی منہ لگی بوتل مہمان کے سامنے حاضر بمعہ ایک خوبصورت گلاس۔ اس پانی میں ہے کچھ خاص۔

آفس

2010-05-30T12:27:00.000+05:00

عمومی رحجان یہی ہے کہ ہم ایک اچھی سی ڈگری حاصل کریں تاکہ ہم کو ایک اعلیٰ قسم کے آفس میں ایک اچھی سی نوکری مل جائے۔آفس میں انہوں نے ہمارے لیےکیوبیکلز بنائے ہوتے ہیں۔ وہاں ہمیں دن کے آغاز میں پہنچنا ہوتا ہے اور باقی دن وہ سب کرنا ہوتا ہے جو ہمیں کرنے کے لیے دیا گیا ہو۔درمیان میں ہمیں ایک وقفہ دیا جاتا ہے جسے لنچ بریک کہتے ہیں تاکہ بھوک کی وجہ سے ہمارے کام کی کوالٹی خراب نہ ہو جائے۔ پھر اپنی بقیہ زندگی ہمیں اپنا پورا دن جب تک کہ وہ ڈھل نہ جائے اپنے آفس میں گزارنا ہوتا ہے۔

اس کے عوض ہمیں کچھ رقم دی جاتی ہے جو کہ ان چیزوں کو خریدنے کے لیے ناکافی ہوتی جو ہمیں درکار ہوتی ہیں۔لہذا ہمیں کچھ ادھاربھی پکڑنا پڑتا ہے جس پر اکثر ہمیں سود بھی دینا پڑتا ہے جو دیکھنے میں تو زیادہ نہیں لگتا لیکن حقیقت میں یہ اتنی بڑی رقم بن جاتی ہے کہ اس کی ادائیگی کرنا ذہنی سکون اور عزت نفس کی پامالی کا باعث بنتا ہے۔

لیکن ہم میں سے کچھ لوگ ایسے بھی ہوتے ہیں جن کے لیے مذکورہ بالا سیٹ اپ قابل قبول نہیں ہوتا۔ان کے دل میں ایک شدید خواہش ہوتی ہے کہ کسی طرح انہیں دفتروں کی قید اور نوکری کی غلامی سے نجات مل جائے۔وہ ایک لیول اوپر آنا چاہتے ہیں ہیلمٹ ڈبہ لائف سٹائل سے جس میں ہم روزانہ ایک ہاتھ میں ہیلمٹ اور دوسرے ہاتھ میں کھانے کا ڈبہ تھامے آفس میں داخل ہوتے ہیں۔وہ اس مشقت سے جان چھڑانا چاہتے ہیں جس میں کوئی دوسرا شخص روزانہ اس بات کا فیصلہ کرتا ہے کہ وہ اپنا وقت کیسے گذاریں۔اورجس آزادی اور خودمختاری کے یہ لوگ خواہاں ہوتے ہیں وہ اس کی قیمت ادا کرنے کے لیے بھی تیار ہوتے ہیں۔لہذا وہ خاصے عرصےتک پکے دھیان اور مستقل مزاجی کے ساتھ زبردست تگ و دو جاری رکھتے ہیں۔ ان میں سے اکثر بالاخر اپنے مقصدمیں کامیاب ہو جا تے ہیں۔بلکہ ان میں سے بعض تو اس مقام تک بھی جا پہنچتے ہیں جہاں آدمی کو پیسے کے لیے کام نہیں کرنا پڑتا بلکہ پیسہ آدمی کے لیے کام کرنا شروع کر دیتا ہے۔

لیکن ایسےسر پھرے بہت کم ہوتے ہیں۔

باقی سب روتے دھوتے، گلے شکوے کرتے رہتے ہیں لیکن اندر سے وہ ان حالات کو جن میں کہ وہ ہوتے ہیں قبول کر چکے ہوتے ہیں۔ وہ مستبقل کی طمانیت کے حصول کے لیے اپنی موجودہ آسانی کی قربانی نہیں دینا چاہتے۔ ایک دیرپا آسائش کے حصول کی خاطر اپنے حالیہ کمفرٹ زون سے کچھ دیر کے لیے باہر آنا انہیں قبول نہیں ہوتا۔

اگر ایسا نہ ہوتا تو تمام دفاتر ویران ہو جاتےاور بڑی بڑی کمپنیاں اور کارپوریشنز جامد ہو جاتیں۔

بد گمانی بڑ ھائیں

2010-05-29T10:51:00.000+05:00

بدگمانی بڑھائیں تو بڑھتی ہی چلی جائے گی۔ پھر گزرتے وقت کے ساتھ آپس کی دوریاں اتنی بڑھ جائیں گی کہ معاملات کو سلجھانا بہت مشکل نظر آنا شروع ہو جائے گا۔ سو بہتر تو یہی ہے کہ بدگمانی شروع ہی نہ ہونے دیں۔ چیزوں کو واضع انداز میں دیکھنے کی کوشش کریں۔ بات جو ہو اور جتنی ہو اسے ویسا ہی اور اتنا ہی دیکھیں۔ اندازے لگانے سے گریز کریں۔ اس ضمن میں اپنےتخیل سے زیادہ کامن سینس کو کام میں لائیں۔

دلوں میں وسوسوں اور ابہام کو پلنے دیں تو وہ بہت بڑے ہو جاتے ہیں۔ ان کا توڑ آپس کی بات چیت سے ہی ممکن ہے۔ دوسرے سے وہ بات کہہ ڈالیں جو اس کے بارے میں آپ کو پریشان کر رہی ہے یا غصہ دلا رہی ہے۔ ایسا کرنے سے غلط فہمی دور ہو جانے کا امکان ہے۔اور غلط فہمی دور ہو جائے تو دل ہلکا ہو جاتا ہے۔ ایک خوامخواہ کے دباو سے آزادی مل جاتی ہے۔زندگی خوشگوار لگنے لگتی ہے۔

بسا اوقات ایک بات دوسرے کے وہم و گمان میں بھی نہیں ہوتی مگر ہم اپنے طور پر تصور کر لیتے ہیں کہ ایسا ایسا ہوا ہے۔ مھض کسی کے چہرے کے تاثرات سے اندازے لگاتے رہنا کہ دوسرا آپ کے بارے میں کچھ اچھا نہیں سوچ رہا یا کوئی فون پر بات کر رہا ہو تو پاس سے گزر تے ہوئے ایک آدھ فقرا یا فقرے کا کچھ حصہ سن کر اپنے دل کو یقین دلا لینا کہ یہ گفتگو میرے خلاف کی جا رہی ہے یا کسی کے ہلکے پھلکے مذاق کے رد عمل میں سیخ پا ہو جانا کہ یہ تو اس نے مجھے طعنہ دیا ہے، میری توہین کی ہے۔۔۔یہ اور اس سے ملتے جلتے دیگر ذہنی رحجانات بد گمانیوں کو جنم دینے اور پھر ان کو استحکام دینے کا باعث بنتے ہیں۔

سورۃ الحجرات کی آیت 12 میں اللہ نے ہمیں بدگمانی سے بچنے کا حکم دیاہے۔ لیکن شیطان جو ہمہ وقت منفی اور فاسد خیالات ہمارے دلوں میں ڈالنے کو بیتاب اور چوکس رہتا ہے وہ ہمیں ایسے اقدامات سے روکے ہی رکھتا ہے جن سے باہم بد گمانیاں دور ہونے کا کچھ سامان ہو سکے۔ اور شیطان صرف جِنّوں میں ہی نہیں ہوتے۔ بد طینت انسانوں کے روپ میں بھی ہماری زندگیوں میں موجود ہوتے ہیں۔ یہ لگائی بجھائی کرنے والے لوگ خاندانوں میں، اداروں میں، مارکیٹوں میں حتیٰ کہ مساجد میں بھی پائے جاتے ہیں۔ ان سے چوکنا رہنا ہر ایک کی اپنی ذمہ داری ہے۔

روٹین نعمت ہے

2010-05-28T10:21:00.000+05:00

کچھ لوگوں کا مسئلہ صرف یہ ہوتا ہے کہ ان کو کوئی مسئلہ نہیں ہوتا۔

رہنے کو انہیں اپنا اچھا خاصا ایک گھر میسر ہوتا ہے۔کرائے کے گھر میں رہنے کے کیا جھنجھٹ ہوتے ہیں اس سے وہ لوگ قطعی نا آشنا ہوتے ہیں۔قطع نظر اس کے کہ بل کتنا آتا ہے، انہیں گرمیوں میں اے سی اور سردیوں میں ہیٹر ہمیشہ دستیاب ہوتا ہے۔فرِج ان کا ہر روز بھانت بھانت کی کھانے پینے کی اشیاء سے بھرا رہتا ہے۔ ریٹ اور ڈیٹ سے وہ لوگ بے نیاز ہوتے ہیں۔پورا مہینہ جس دن بھی جو دل چاہے جا کر اپنی پسند کی دکان سے خرید لیتے ہیں۔ جب دل کرے اپنی مرضی کے ریستوراں میں جا کر کھانا کھا لیتے ہیں۔سارا سال ان کا پرس پنج ہندسی کیش سے روزبھرا رہتا ہے۔

سفر کرنے کو ان کے پاس اپنی گاڑی ہوتی ہے جس کا ٹینک وہ خالی ہونے سے پہلے ہی پیٹرول سے لبا لب بھروا لیتے ہیں۔دور کے سفر کے لیے جہاز استعمال کرتے ہیں۔ انہیں زندگی بھر پتا ہی نہیں چلتا کہ بسوں، ویگنوں، ریل گاڑیوں کے سفر میں کیا گزرتی ہے اور موٹر سائکل پر پورا خاندان ڈھونا کیا معنی رکھتا ہے۔سال میں ایک دو بارکسی پرسکون جگہ پر جا کر چھٹیاں بھی گزارتے ہیں۔ اللہ نے انہیں بیماری اور معذوری سے بھی بچایا ہوتا ہے۔ تھانوں، کورٹ کچہری سے بھی دور رکھا ہوتا ہے۔سرکاری محکموں میں اپنے کام کے لیے دھکے کھانے کی نوبت بھی ان کی زندگی میں کبھی نہیں آئی ہوتی۔ غرض کہ کمال بےفکری اور آسانی کی زندگی گذار رہے ہوتے ہیں۔

اس سب کے باوجود ان کا کہنا ہوتا ہے کہ وہ روٹین کی زندگی سے نالاں ہیں۔ وہ کہتے ہیں کہ وہ زندگی کی یکسانیت سےبورہو چکے ہیں۔اب ان بے خبر لوگوں کو کون بتائے کہ بھائی یہ روٹین تو نعمت ہے۔ یہ جو ہم صبح اٹھتے میں اور رات سونے تک بغیر کسی خوف و رنج سے گزرے اپنے تمام کام ترتیب سے کر جاتے ہیں یہ بہت بڑی نعمت ہے۔لیکن چونکہ بیچ میں کوئی رکاوٹ نہیں آتی اس لیے ہم جان ہی نہیں پاتے اس بات کی قدر۔ہم شاکی اور ملول رہتے میں کہ یہ بھی کوئی زندگی ہے جو ہم گذار رہے ہیں۔بس ایک ہی روٹین روز ایک جیسی۔ یک رنگی۔ بے کیف۔

اچھا لیکن آپ نےکبھی کسی کو ایسا کچھ بتاتےبھی تو سنا ہو گا :

”جناب وہ اچھا بھلا روٹین کے مطابق صبح اٹھا۔ دفتر کے لیے تیاری کر رہا تھا کہ بس اچانک فالج کا ایسا اٹیک ہوا۔۔۔“

”بھائی وہ ہم دوپہر کا کھانا معمول کے مطابق کھا کر ابھی بیٹھے ہی تھے کہ اچانک اطلاع ملی کہ چھوٹا بھائی سیڑھیوں سے گر گیا ہے۔بس تب سے سب بھاگے پھر رہے ہیں۔۔۔“

”یار میں روزانہ کی طرح روٹین کے رستے سے دکان سے واپس آ رہا تھا کہ اچانک فائرنگ شروع ہو گئی۔ایسی بھگدڑ مچی کہ میں سمجھ ہی نہیں پایا کہ کیا ہوا ہے۔ آناً فاناً پولیس کی ایک وین وہاں نمودار ہوئی اور اور لوگوں کے ساتھ مجھے بھی اس میں بٹھا کر یہاں حوالات لے آئے ۔ اس دن سے یہاں ایڑیاں رگڑ رہا ہوں،کوئی شنوائی نہیں۔۔۔“

یا پھر کسی ہسپتال کے وارڈ میں جا کر مختلف لوگوں سے جانیں روٹین کی قدر۔ اور پوچھیں یہ بور ہونا کیا ہوتا ہے۔

یہ جتنی بھی یہ والی باتیں ہیں

2010-05-27T14:14:00.000+05:00

یہ جتنی بھی یہ والی باتیں ہیں
جو تمہیں بتا ئی جاتی ہیں
اور جو تم مجھے بتاتی ہو
ان سب کا مقصد بس ہے یہ
کہ وقت گزرئے۔
زیادہ سے زیادہ وقت گزرئے
تاوقتیکہ
اتنا وقت گزر جائے
کہ یہ محبت مر جائے۔۔۔

ادھاریئے

2010-05-26T00:57:00.000+05:00

سپر سٹور میں کوئی گھنٹہ بھر صرف کرنے کے بعد آپ اپنی سامان سے بھری ٹرالی لیے کیش کاونٹر پہ پہنچتے ہیں۔یہ دیکھ کر آپ قدرے اطمینان محسوس کرتے ہیں کہ آپکے آگےقطار میں صرف ایک آدمی ہے جو نیکر پہنے، ایک ٹوکری پکڑے کھڑا ہے،سو آپ جلدی فارغ ہو جائیں گے۔اس آدمی کی ٹوکری میں دو ایک جوڑے جراب، ایک ۵۰۰ ایم ایل کی پیپسی، تین بڑی موم بتیاں اور ایک رس کا پیکٹ پڑا نظر آ رہا ہے۔جلد ہی اس کے سامان کی بلنگ کا سلسلہ شروع ہو جاتا ہے۔

لیکن کئی منٹ گزرنے کے باوجود آپ کی باری نہیں آتی تو آپ دھیان دیتے ہیں کہ آخر ماجرا کیا ہے۔ آپ سوچتے ہیں اتنا سا سامان تو زیادہ سے زیادہ دو منٹ میں کیش رجسٹر سے گزر جانا چاہیےتھا تو پھر آخر کاونٹر کے دوسری جانب کھڑا شخص کر کیا رہا ہے؟

سو آپ کیشیئر کی جانب توجہ کرتے ہیں تو اسے ایک کارڈ ایک مشین میں پھیرتا ہوا پاتے ہیں۔ اس کے چہرے سے لگ رہا ہے کہ اس کو مطلوبہ نتائج حاصل نہیں ہو رہے۔وہ کچھ توقف کرتا ہے اور پھر سے اس کارڈ کو مشین میں پھیرنے لگ جاتا ہے۔ساتھ میں کچھ بٹن بھی دباتا جاتا ہے۔ اس سب میں کئی منٹ اور گذر جاتے ہیں۔پھر آپ یہ دیکھ کر بے چینی کی ایک نئی لہر سے دوچار ہو جاتے ہیں کہ اب وہ کیشیئر کاونٹر سے ہٹ گیا ہے اور پتا نہیں کدھر چلا گیا ہے۔ اس دوران اس کارڈ کا مالک، یعنی وہ شخص جو لائن میں آپ سے آگے کھڑا ہے اطمینان سے موبائل فون پر کسی سے باتیں کرنے میں مشغول رہتا ہے۔

کافی دیر بعد وہ کیشیئر واپس آ کر اپنی جگہ کھڑا ہو جاتا ہے۔ وہ کہیں سے ایک اور مشین لے کر آیا ہے اور اب اس والی مشین میں کارڈ کو پھیرنے میں مشغول ہو جاتا ہے۔ کافی ٹائم گذر جاتا ہے۔ پھر کیشیئر پاس پڑے فون سے کسی سےاس مسلے کی بابت کچھ بات کرنے لگ جاتا ہے۔آپ کھڑے بیزار ہوتے رہتے ہیں۔فون رکھ کر کیشیئر اس گاہک سے کچھ کہتا ہے۔ جواب میں وہ گاہک کمال بے اعتنائی سے ایک اور کارڈ کیشیئر کے سامنے پھینک دیتا ہے۔ اب کیشیئر اس والے کارڈ کو لے کر مشین پر طبع آزمائی کرنے میں مگن ہو جاتا ہے۔ کئی منٹ گزر جاتے ہیں۔

آخر کار کچھ آوازیں مشین سے آتی ہیں جن سے لگتا ہے کہ اب کی بار کام یابی ہو گئی ہے۔کچھ دیر بعد کیشیئر اس صاحبِ کارڈ کے سامنے ایک کاغذ رکھتا ہے جس پر جناب نے اپنے دستخط کرنے ہوتے ہیں۔ وہ صاحب لکھنا شروع کرتے ہیں تو لگتا ہے کہ قلم جواب دے گیا ہے۔وہ اس کو پاس پڑی بل بک کے گتے پر رگڑتے ہیں۔ پھر قلم کی نب کو کا ؤنٹر پر یوں زور زور سے مارتے ہیں جیسے قلم کو دانا چگا رہے ہوں۔ پھر اس کو ہوا میں پوری طاقت سے چھڑکنا شروع کر دیتے ہیں۔ کیشیئر اس اثنا میں کوئی دوسرا آلہ تحریر ڈھونڈنے کے لیے اپنی جگہ سے ہٹنے ہی لگتا ہے کہ آپ تلملاتے ہوئے اپنا قلم نکال کر پیش کر دیتے ہیں۔

ایک طویل وقت ضائع ہو چکا ہوتا ہے جس کے دوران آپ اندرہی اندر بلبلا تے رہے کہ خدارا ان ادھاریئوں کے لیئے الگ کاونٹر بنالو۔ان کی چند سو کی شاپنگ کے لیئے دس ہزار کیش کے گاہک کو ناحق تکلیف میں ڈالا جاتا ہے۔ مگر یہ بات دکان ولوں کی سمجھ میں شاید کبھی نہیں آ سکتی۔

ان ادھارکے دلدادہ لوگوں کے جنجال صرف شاپنگ مالز تک ہی محدود نہیں۔ اپنی زندگی تو یہ ادھاریئے ادھار لے لے کرآخر کار اجیرن کر ہی لیتے ہیں لیکن باقی معاشرہ بھی ان کے غیر ذمہ دارانہ طرز زندگی سے بے طرح متاثر ہوتا ہے۔

۱۹۲۹ میں جو امریکی سٹاک مارکیٹ کریش ہو گئی تھی وہ ان ادھاریئوں کے سبب ہی ہوئی تھی۔ اس وقت پھیلنے والی عالمی کساد بازاری کی جڑوں میں یہ قرض کے رسیا لوگ ہی تھے۔ ہمارے اپنے بازار حصص میں جب بھی کوئی بھونچال آیا انہی بدلے والوں کی وجہ سے آیا۔ ماضی قریب میں سڑکوں پہ دیکھتے ہی دیکھتے جو کاروں کا بے انتہا اضافہ ہوا، انہی ادھار کے شوقین لوگوں کی وجہ سے ہی ہوا۔ جس کی اصل استطاعت شاید موٹر سائیکل خریدنے کی بھی نہ تھی اس نے بھی ادھار کے پیسوں کی گاڑی لی، اس میں سی این جی لگوائی اور سڑکوں پہ اندھی مچا دی۔ جلد ہی ان میں سے آدھی سے زیادہ گاڑیاں بنک نے واپس ضبط کر لیں کیونکہ ادھاریئے حسب معمول ادائیگی کی استطاعت نہ رکھتے تھے۔ ۲۰۰۸ میں امریکہ میں جو سب پرائم فیاسکو کا طوفان اٹھا، وہ تبھی اٹھا جب لاکھوں ادھاریئوں نے ادھار کی واپسی کے وقت ہنس کر دکھا دیا۔پچھلے سال دبئی کا مالیاتی پٹاخہ بھی اسی وجہ سے پھوٹا کیونکہ ساری ٹیپ ٹاپ، شو شا ادھار پہ ہی کھڑی تھی۔

اللہ رحم کرے اگر انسان مجبوری میں کسی اشد ضرورت کی وجہ سے ادھار کے چنگل میں پھنس جائے تو اور بات ہے۔ مگر محض دیکھا دیکھی، صرف لائف سٹائل کو ٹی وی پہ دکھائے جانے والی زندگیوں کے مطابق بنانے کے لئے بغیر سوچے سمجھے ادھار لیتے چلے جانا کسی طرح بھی کبھی بھی خیر والی بات نہیں ہو سکتی۔

کریڈٹ کارڈ، لیزنگ، مورگیج، پرسنل لون، انسٹالمنٹس وغیرہ ۔۔۔نام چاہے کچھ بھی ہو ادھار ہوتا ایک لعنت ہی ہے۔

انٹرنیٹ کی اردو دنیا میں ہم آہنگی

2010-05-24T20:04:00.000+05:00

منظر نامہ نے نقطہ نظر بیان کرنے کے لئے بہت حسب حال موضوع دیا ہے۔ بات یہ ہے کہ جہاں بھی کچھ انسان اکٹھے ہوں گے وہاں پر خیالات اور آراء کی سو فیصد ہم آہنگی کا پایا جانا ممکن نہیں۔ اس کا اطلاق اردو انٹرنیٹ کی دنیا پر بھی ہوتا ہے۔ انٹرنیٹ پر اردو لکھنے اور پڑھنے والے لوگ روزانہ فورمز اور بلاگز کے توسط سے ا یک دوسرے سے بات چیت کا سلسلہ چلاے رکھتے ہیں۔ زیادہ تر تو یہ سلسلہ موافق ماحول میں جاری رہتا ہے لیکن کبھی کبھار یہ ہم آہنگی کے فقدان کا شکار ہو جاتا ہے جو کہ ایک نارمل بات ہے۔

بلاگز پہ تبصرہ کرنے کی سہولت کی دستیابی تبادلہ خیالات کو ممکن بناتی ہے۔ بنیادی طور پر یہی چیز ایک بلاگ کو روا ئتی ویب سائٹ سے ممتاز کرتی ہے۔ لیکن یہی تبصرہ کرنے کی سہولت اس وقت گڑ بڑ کا باعث بن جاتی ہے جب تبصرہ کرنے والا تحمل کا دامن ہاتھ سے چھوڑ دیتا ہے۔ یہ تب ہوتا ہے جب آپ بلاگ پر لکھی ہوئی پوسٹ میں کہی گئی بات کو ٹھیک سے سمجھے بغیر ہی اشتعال میں آجاتے ہیں اور تحریر لکھنے والے کو شدید تنقید کا نشانہ بنا ڈالتے ہیں۔ جواباً وہ شخص بھی جذبات کی رو میں بہہ جاتا ہے اور اپنے رد عمل کے اظہار میں کہاں سے کہاں نکل جاتا ہے۔

ہمیں چاہیے کہ جب بھی لگے کہ دوسرے کی بات ، چا ہے وہ بلاگ پوسٹ میں ہو یا کسی تبصرے میں، ہمیں ناگوار گزری ہے تو ذرا سا ٹھیر جائیں۔ فوراً ہی اس کا جواب لکھ کر اسی وقت اسے شائع کرنے سے گریز کریں۔ جیسا کہ کہا جاتا ہے کہ غصہ کی حالت میں کسی کو خط نہ لکھیں، وہی بات یہاں پر بھی ہے۔ آپ یہ کر کے دیکھیں۔ اپنے تبصرے کو ایک دن کے لیے موّخر کر دیں۔اگلے دن اپنا تبصرہ شائع کرنے سے پہلے وہ تحریر جس پر آپ اپنا ردعمل ظاہر کرنے والے ہیں اسے ایک بار پھر پڑھ لیں۔ ساتھ میں ان تبصرہ جات کو بھی پڑھ ڈالیں جو اس اثنا میں دوسرے لوگوں نے وہاں لکھے ہیں۔ اس سب کو پڑھ کر ہو سکتا ہے کہ بات آپ کو ایک نئے زاویے سے نظر آنی شروع ہو جائے۔ بہت امکان ہے کہ کل آپ جس نکتے پہ سیخ پا ہو گئے تھے آج آپ کو لگے کہ اس میں تو غصہ کرنے کی کوئی ایسی بات ہی نہیں۔نتیجتاً ممکن ہے آپ اپنے اشتعال انگیز تبصرے میں مناسب ترمیم کر لیں۔ حتی کہ یہ بھی ہو سکتا ہے کہ آپ اس تبصرے کو اب غیر ضروری سمجھ کر شائع کرنے کی ضرورت ہی نہ سمجھیں۔

عام زندگی کی طرح انٹرنیٹ پر بھی لازم ہے کہ ہم تحمل اور صبر کا دامن ہاتھ سے نہ چھوڑیں۔ اس سے بے جا غلط فہمیوں کو سر اٹھانے کا موقعہ ہی نہ ملے گا۔ لیکن یہ بھی ہم جانتے ہیں کہ تمام تر کوشش اور ارادے کے باوجود ہم ہمیشہ ہی اس قدر نظم و ضبط کے پابند نہیں رہ سکتے۔ اس لیے انٹرنیٹ کی اردو دنیا میں بھی کچھ نہ کچھ نوک جھونک گاہے بگاہے ہوتی ہی رہے گی۔ بلکہ بہت سے قارئین تو سمجھتے ہیں کہ یہ ہوتی ہی رہنی چاہیے کیونکہ ان کے خیال میں اسی گرما گرمی سے ہی بلاگز اور فورمز پہ زندگی کے رنگ اور دلچسپی برقرار رہتے ہیں۔ اس لیے چاہے وہ اس کا اظہار نہ بھی کریں لیکن اندر اندر سے وہ ان بلاگرز کو ذرا پسند ہی کرتے ہیں جو ہر صورت میں، چاہے آپ کچھ بھی لکھ دیں، بات کا بتنگڑ بنا کر، اسکا کچھ کا کچھ مطلب نکال کر، اس کو اس مہارت سے طول دیتے ہیں کہ پھر تقریباً پورا بلاگستان ہی اس کی لپیٹ میں آ جاتا ہے اور ہر طرف کراس فائر شروع ہو جاتے ہیں۔رونقیں دوبالا ہو جاتی ہیں۔

شکر ہے چہرہ کتاب بند ہوئی

2010-05-20T15:54:00.000+05:00

اللہ کا شکر ہے فیس بک سے جان چھوٹی ۔گو عارضی طور پہ ہی سہی پر کچھ دیر کو تو بند ہوئی یہ سائٹ۔ میں اس منحوس سائٹ سے پہلے ہی سخت نالاں تھا۔ بچے اور بڑے دونوں اس پہ روزانہ لا تعداد گھنٹے لا یعنی قسم کی سرگرمیوں میں ضائع کر دیتے تھے۔شکر ہے بہت سےلوگ ایسے بھی ہیں جو اپنی قوت ارادی کی بدولت اس جنجال سے چھٹکارہ پانے میں کامیاب ہو چکے ہیں۔

باقی رہ گیا وہ معاملہ جس کی وجہ سے فیس بک جزوی اور عارضی طور پہ پاکستان میں بند ہوئی ہے تو اس کی بابت میرے ا حساسات وہی ہیں جو خورشید آزاد نے اپنے ایک تبصرے میں لکھے ہیں:

”میں سمجھتا ہوں محمدصلی اللہ علیہ وسلم اتنی بڑی ہستی ہیں کہ یہ کارٹون وغیرہ ان کا کچھ نہیں بگاڑ سکتے، ہاں ہمارا اپنے آپ کو ان کا امّتی کہنا ان کے رتبے کے لیے ان کارٹونوں سے زیادہ خطرناک ہے۔“

اور پھر سارہ پاکستان نے جوکچھ کہا ہے وہ ناگوار تو شاید بہتوں کو گزرے گا مگر اصل بات اورواقعتا صورتحال بالکل ایسی ہی ہے:

”ایک پیام بر کی اس سے زیادہ توہین بھلا کیا ہوگی کہ اس کے لائے ہوئے پیغام کو آپ ایک نظر بھر کے بھی پوری طرح نہ دیکھیں ،اور پھر اس پیغام کی خلاف ورزی میں مصروف ہوجائیں ۔۔۔۔“

میں سمجھتا ہوں کہ یہ جو کچھ احتجاج ہو رہا ہے وہ اپنی جگہ درست ہے لیکن اگر آج مسلمان با عمل ہوتے تو ان ماڈرن، مہذب، ماڈریٹ، سیکیولر، روشن خیال، ترقی یافتہ گوروں کو اتنی جسارت کرنے کی سوچ بھی نہ آتی۔اور ان سے شدید متاثر اور ان کی اندھی تقلید کرنے والے بیچارے آزاد خیال دیسی بھی اللہ اور رسول اللہ صلی اللہ علیہ وسلم کی احکامات پر عملی طور پر چلنے کی بات کرنے والوں کو مولوی، ملا وغیرہ جیسے القابات سے نواز کر نظر انداز نہ کر رہے ہوتے۔

ایک اچھی تحریر کی خوبی

2010-05-19T15:24:00.001+05:00

اس اہم موضوع پہ نعمان رقمطراز ہیں:

”ایک اچھی تحریر کی خوبی لوگ اکثر اسطرح جانچتے ہیں کہ وہ کسقدر اثر انگیز ہے، مصنف اپنا پیغام قاری تک پہنچانے میں کامیاب رہا یا نہیں۔ باقی سب چیزیں ثانوی ہیں۔

بعض اوقات لکھنے والے الفاظ کے چناؤ میں بے احتیاطی کے سبب اپنی تحریر کی اثر پذیری اور قاری تک اپنا نکتہ نظر پہنچانے میں ناکام ہوجاتے ہیں۔

تو سوال یہ ہے کہ اگر آپ اس معیار میں ناکام ہوجائیں تو تحریر اچھی کہلانے کی مستحق ہوگی؟

اس کی بہت ساری مثالیں کلاسیکی ادب میں موجود ہیں۔ جب ماہرین فن نے ٹکسالی فحش زبان کو ذریعہ اظہار بنایا ہے۔ مگر تب جب الفاظ کا یہ چناؤ اور اظہار کا یہ طریقہ ان کی تحریر کی اثر پذیری اور مقصدیت کے لئے ضروری تھا۔ جملے بازی اور فحش تمثیل کا بے جا استعمال تفریح کا ذریعہ تو ہوسکتا ہے، مگر یہ کسی تحریر کو اچھا نہیں بناتا۔

تحریر اچھی ہونے سے مراد یہ نہیں کہ اسے شاہکار ہی ہونا چاہئے۔ لیکن ایسا ہونا چاہئے کہ قاری اس سے لطف اندوز ہو۔ وہ اسے ٹھیک سے سمجھ سکے اور اس میں موجود پیغام، خیال یا سوال کی تائید و تردید کر سکے۔

بعض اوقات ایسا بھی ہوتا ہے کہ بطور قاری آپ کو مصنف کا الفاظ کا چناؤ ناگوار گزرتا ہے۔ یہ قطعا قاری کا نہیں بلکہ سراسر مصنف کا قصور ہے کہ اس نے قاری کو اس ناگواری کا سامنا کرنے کے لئے تیار نہیں کیا۔ اور الفاظ کے بے جا چناؤ کے سبب قاری کو تحریر مقصد سے عاری اور پھکڑ بازی پر مبنی نظر آئی۔

قاری کو یہ احساس ہوا کہ مصنف پھکڑ بازی پسند کرنے والے ٹولے کی داد پانے کے لئے اپنے معیار پر سمجھوتہ کررہا ہے۔ وہ اپنی بذلہ سنجی، شگفتگی اور ذہین حس مزاح کو ٹھیلے پر بکنے والے فحش لطیفوں کی سطح پر لے کر آرہا ہے۔ قاری اسے اپنی تذلیل سمجھتا ہے۔ کیونکہ ایک مصنف جسے مسلسل پڑھنے والے قاری مل جائیں تو قارئیں اور اس کے درمیان اعتماد کا ایک رشتہ قائم ہوجاتا ہے۔ قاری کو محسوس ہوتا ہے کہ مصنف اپنے انداز سے پھر رہا ہے اور وہ اس بے وفائی پر مصنف کو برا بھلا کہتا ہے۔

آپ کو ایسی کئی مثالیں ملیں گی جن میں لکھنے والوں نے اپنے انداز تبدیل کرنے کی بارہا کوشش کی اور پھر وہیں لوٹ آئے جو ان کا انداز تھا۔ وجہ یہ نہیں تھی کہ وہ قاری کے قصیدوں کے بھوکے تھے بلکہ وجہ یہ تھی کہ وہ اپنے اصل انداز میں زیادہ پراثر تھے۔

اگر آپ اچھا لکھنا نہیں چاہتے، یعنی نہ اثرانداز ہونا چاہتے ہیں نہ خیالات کی ترسیل چاہتے ہیں۔ تو پھر آپ اچھا لکھیں چاہے برا، کیا فرق پڑتا ہے؟“

کم از کم ہم دبئی تو نہیں ہیں

2010-05-13T11:31:00.000+05:00

”جارج کا پاکستان“ والا جارج یاد ہے نا آپکو؟ اس برطانوی صحافی کا پورا نام جارج فلٹن ہے (جسے بعض اوقات میں فُل ٹُن بھی پڑھا جا سکتا ہے)۔

حال ہی میں جارج کا ایک مضمون دی ایکسپریس ٹریبیون میں شائع ہوا ہے جس کا لب لباب یہ ہے کہ گو کہ ان دنوں ہم پاکستان میں اتنے خوش نہیں ہیں لیکن شکر ہے پاکستان دبئی نہیں ہے۔

وہ لکھتا ہے کہ پاکستان میں لوڈشیڈنگ، دھماکوں اورمیڈیا کے ذریعے مسلسل پھیلائی جانے والی قنوطیت اور بے یقینی سے بیزار ہو کر میں نے سوچا کہ چند دن دبئی جا کر کچھ چین اور سکوں پاوں۔مگر یہ تو بڑی غلطی ہوئی۔دس دن بعد ہی میں کراچی کی آلودہ مگر کہیں زیادہ سہانی فضا ؤں کو ترستا واپس آن پہنچا۔دبئی میں دنیا کی سب سے بلند عمارت اور دنیا کا سب سے بڑا شاپنگ مال ضرور ہے لیکن ساتھ ہی ساتھ یہ بھی حقیقت ہے کہ احساسات و جذبات سے عاری ہونے میں بھی یہ شہر اول نمبر پر ہے۔یہ محض شیشے اور لوہے سے بنا ایک بے روح پلاسٹک کا شہر ہے۔

دبئی نے مغربی معاشرے کے منفیات جیسے ماحولیاتی آلودگی، بکثرت اصراف وغیرہ تو اپنے ہاں درآمد کر لیے ہیں لیکن وہاں کی کوئی کار آمد چیز جیسے آرٹ یا جمہوریت وغیرہ کچھ بھی حاصل نہیں کیا۔ دبئی بس نفس پرستوں کے لیے فوری لذت کی دستیابی کے سامان لیے ہوئے ایک شہر کے طور پر بنایا گیا ہے جہاں تیز رفتار زندگی نفسانی خواہشات کے پجاریوں کی منتظر ہے۔ یہ شہر یوں لگتا ہے جیسے لاس ویگاس نے بس دشداشہ پہن لیا ہے۔

دبئی میں قیمتی ترین شراب سے لے کر مہنگی ترین چھنال سب دستیاب ہے۔ وہاں کے شاپنگ مالز، کیپیٹل ازم اور مادیت کے گڑھ، زندہ مُردوں کے مزار دِکھتے ہیں۔بے کیف اور اداس روحیں ان مالز میں ہمہ وقت بھٹکتی دکھائی دیتی ہیں کہ اپنی زندگی کے خلاوں کو بھانت بھانت کی چیزوں، ملبوسات اور فاسٹ فوڈ سے شاید پُر کر سکیں۔مال آف ایمیریٹس میں اذان کی آواز گونجتی ہے مگر کوئی بھی نماز کو نہیں جاتا۔ سب سٹیلا میک کارٹنی، گُچی،پراڈا کو سجدہ کرنے میں مشغول رہتے ہیں۔ مختلف قومیتوں کے لوگ بڑے بڑے چشموں اور بڑے بڑے بیگوں سے لیس ،طرح طرح کے آدھے پورےلباس پہنے،سٹیٹس اور دولت کی دوڑ میں ایک دوسرے کو نیچا دکھانے اور پیچھے چھوڑنے کی دھن میں وہ کپڑے جنہیں وہ کبھی نہیں پہنیں گے اور وہ کتابیں جنہیں وہ کبھی نہیں پڑھیں گے، اندھا دھند خریدتے دکھائی دیتے ہیں۔

اعلی اقدار کے فقدان کے ساتھ ساتھ دبئی معاشی دیوالیہ پن کا بھی شکار ہو چکا ہے۔حکمرانوں کی عجیب و غریب سوچ اور اول جلول منصوبہ بندی کے باعث دبئی اب 80 ارب ڈالر کا مقروض ہے۔وہاں کی سٹاک مارکیٹ اور پراپرٹی مارکیٹ کے پڑخچے اڑ چکے ہیں۔ماضی قریب میں نظر آنے والی ترقی محض خواب اور سراب ثابت ہوئی ہے اور اب مستقبل مخدوش دکھائی دیتا ہے۔

سو وہ سب لوگ جو پاکستان کو اس کے مسائل کی وجہ سے کوستے رہتے ہیں انہیں چاہیے کہ وہ تھوڑا قرار پکڑیں اور ہر وقت کے طعن و تشنیع اور رونے دھونے سے ذرا رک کر پاکستان کی ثقافتی ، مذہبی اور لسانی تنوع اور خوبصورتی پہ بھی ایک نظر ڈالیں۔ ٹھیک ہے بہت چیزوں کا فقدان ہے مگر ہم جمہوریت کی نعمت سے تو مالا مال ہیں۔ ہماری میڈیا غیر ذمہ دارسہی مگر ہے تو بہت مستحکم۔ بد عنوانیاں ہیں مگر ہم پولیس سٹیٹ تو نہیں ہیں۔ چار سو کوڑا کر کٹ ہے تو کاغذ اکٹھا کرنے والے بھی تو ہیں۔

آخر میں جارج کہتا ہے کہ پاکستان میں کیڑے نکالنے والے یاد رکھیں کہ یہ ملک روح و جان اور زندگی کی حدت سے بھرپور ہے۔ کم از کم یہ دبئی تو نہیں ہے۔

جارج کے اس مضمون پر بہت سے قارئین نے اپنے اپنے تبصرے کئے ہیں. انہیں پڑھے بنا اس مضمون کا تاثر ادھورا رہتا ہے. طرح طرح کی آراء ہیں۔مثلآ ایک صاحب عمر زبیر اعوان صاحب کہتے ہیں کہ کراچی میں بھی خوشحال طبقے کے یہی انداز ہیں اور بھینس کالونی، مچھر کالونی اور فقیر کالونی کے باسیوں کو کلفٹن کے پل کی دوسری جانب جا کر ویسا ہی لگتا ہے جیسا جارج نے دبئی جا کر محسوس کیا۔

پھر کانر پارسل نامی ایک صاحب نے جارج کے اس مضمون کے بعد جو ایک جوابیہ مضمون لکھا وہ بھی پڑھنا دلچسپی سے خالی نہ ہو گا۔

جارج کا یہ مضمون یہاں دیکھا جا سکتا ہے۔

ٹیلیفون پہ بات کرنے کی بابت دو باتیں:

2010-04-27T17:25:00.000+05:00

پہلی تو یہ کہ اگر آپ یہ چاہتے ہیں کہ فون پہ آپ سے بات کرنے والا شخص یہ جان لے کہ آپ کو اس سے بات کر کے خوشی ہو رہی ہے تو بس اتنا کریں کہ جب کسی کا فون آئے تو آپ مسکراتے ہوئے کال اٹینڈ کریں۔ دوسرا شخص گو کہ آپ کی مسکراہٹ دیکھ نہیں سکے گا لیکن ایک خوشگواری کا احساس لازمی محسوس کرے گا۔سو اسے آپ سے بات کر کے خوشی ہو گی۔آپ کی مراد بر آئے گی۔

دوسری بات یہ ہے کہ اگر آپ چاہتے ہیں کہ آپ سے فون پہ بات کرنے والا شخص جھنجھلاہٹ کا شکار ہو جائے اور آپ سے بات کر کے اس کو بدمزگی کا احساس ہو تو اس کے لیئے آپ کو بس اتنا کرنا ہو گا کہ فون پہ اس سے بات کرنے کے دوران آپ کچھ کھاتے رہیں۔ اگر ساتھ ساتھ کچھ پی بھی رہے ہوں تو نتائج اور بھی موثر ہوں گے۔

جب بھی وہ شخص اپنا فقرہ ختم کر کے آپکے جواب کی توقع کر رہا ہو گا اس وقت آپ کی طرف سے اس کو کھانا چبانے اور کچھ گھونٹ نگلنے کی آوازیں آ رہی ہونگی۔پھر کچھ تاخیر سے اس کو آپ کی بات سننے کو ملے گی تو ضرور مگر اس میں تسلسل نہ ہو گا۔ آپکا فقرہ بار بار کھانا چبانے اور نگلنے کے عمل کے باعث تعطل کا شکار رہے گا۔

جب تقریباً ہر فقرے پہ ایسے ہی ہو گا تو اس شخص کا تلملانا فطری بات ہے۔ پھراگر تنگ آ کر وہ شخص آپ سے استفسار کرے کہ آیا آپ کچھ کھا رہے ہیں تو لازم ہے کہ آپ اس کے اس سوال کو نظر انداز کر کے اپنی بات جیسے تیسے جاری رکھیں۔ اس سے اس کے صبر کا پیمانہ مزید لبریز ہو جائے گا۔آپ کی بات بن جائے گی۔

دوست،دوستی،دوستیاں،دوستانے

2010-04-24T16:29:00.000+05:00

یہ سو کالڈ سوشل نیٹ ورکنگ کی جو سائٹس ہیں ان کی ضرورت سے زیادہ تعداد معرض وجود میں آ چکی ہے۔ شروع شروع میں جب مثلاً آرکٹ آیا تھا تو ایسی سائٹس کا آئیڈیا کچھ کشش رکھتا تھا اپنے اندر۔ اب جس پیمانے پہ نیٹ ورکنگ کے یہ سلسلے دستیاب ہیں انٹرنیٹ پر اتنی نیٹ ورکنگ کی کسی معقول انسان کو ہرگز ضرو رت نہیں۔ اپنے خاندان اور ہمسائیوں سے چاہے مہینوں،سالوں نہ ملو، سات سمندر پار اجنبیوں سے روابط کے لیے سر دھڑ کی بازی لگا دو۔ گھر کے افراد جن کے ساتھ سالوں سے ایک چھت تلے زندگی گزار رہے ہوتے ہو ان کے احساسات اور دلی کیفیات سے تو کوئی آگاہی نہ ہو لیکن جن کے ساتھ سالوں پہلے کسی ادارے میں الٹا سیدھا کچھ وقت گزارا تھا ان سے رابطہ دوبارہ قائم کرنے کے لیے لامتناہی وقت کمپیوٹر پہ گزار دو۔ کمال ہے۔

باقی سکول، کالج، یونیورسٹی کی دوستیوں کی جہاں تک بات ہے تو دیکھیئے وقت کے ساتھ ہمارا ذہنی معیار تبدیل ہوتا ہے۔ زندگی کے تجربات ہماری سوچوں اور خیالات کو بدلتے رہتے ہیں۔ ہماری پسند اور ترجیحات میں گزرتے سالوں کے ساتھ بہت تبدیلی آ جا تی ہے۔ ہمارے آیڈیئلز اور گولز بھی بدل جاتے ہیں۔ بہت سی چیزوں اور سرگرمیوں کو ہم آوٹ گرو کر جاتے ہیں۔ یہ شخصیت کی میچوریٹی اور بالیدگی کا عمل ایک خوش آئند بات ہوتی ہے۔ اسی کے پیش نظر انہی لوگوں کے ساتھ اسی انداز میں دوستی نبھانے کا عمل آج بھی ویسے ہی جاری رکھنا جیسے کئی سال پہلے شروع کیا تھا ایک مقام پہ پہنچ کر ناممکن ہو جاتا ہے۔ جو کتابیں رسالے آپ کچھ سال پیچھے خرید کر پڑھتے تھے اب ان کو مفت بھی ہاتھ تک لگانا نہیں پسند کرتے۔ وہ لطیفے جن پہ آپ دل کھول کر تب ہنستے تھے اب ان پہ ٹھیک سے رونا بھی نہیں آتا۔ وہ سرگرمیاں جن کو کچھ سال پہلے آپ زندگی کا حاصل سمجھتے تھے آج وہ آپ کو لایعنی لگتی ہیں۔اس سب کے نتیجے میں آپ ان لوگوں کے بیچ اور وہ آپ کی موجودگی میں ان ایزی محسوس کرنا شروع ہو جاتے ہیں۔آخر کار کنارہ کرتے ہی بنتی ہے۔

اب رہ گیا یہ سوال کہ پھر یہ جو ان گنت لوگ پرانی دوستیاں اور یاریاں بخوبی نباہ رہے دکھائی دیتے ہیں یہ کیونکر ممکن ہوتا ہے ان کے لئے۔ تو اس کے لئے آپ اگر ان کی صورتحال کو قریب سے دیکھیں تو آپ کو اندازہ ہو جائے گا کہ بات وہ نہیں ہے جو نظر آتی ہے۔ ایک دوسرے کو جگر جگر کہنے والے حقیقت میں ایک دوسرے سے کس قدر ناک دم آئے ہوتے ہیں اس کے لئے آپ ان میں بیٹھ کر ان کی گفتگو ان میں سے اس کے بارے میں سنیں جو اس وقت وہاں موجود نہیں ہے۔ تب آپ جان پا ئیں گے کہ یہ ”دوست“ایک دوسرے کے بارے میں کسطرح سوچتے ہیں۔ کوئی اس بات سے تنگ ہے کہ فلاں دوست نے پہلے بھی کچھ رقم ادھار کا کہہ کر لی تھی ۔وہ تو ابھی تک لوٹائی نہیں اوپر سے آج پھر ایک اور دوست کے ذریعے کچھ مزیدرقم منگوا لی۔ اسی طرح کوئی رونا رو رہا ہے کہ فلاں دوست گاڑی مانگ کر لے گیا تھا۔حادثہ کر کے واپس لے آیا ہے۔ اب میں پریشان ہوں کیا کروں؟ کوئی اس بات سے نالاں ہے کہ مجھے محض دوستیاں نباہنے کے لئے، دوستوں کے شکوے اور ناراضگی سے بچنے کے لیے ایسی سرگرمیوں میں حصہ لینا پڑتا ہے جن کو میں دل سے اچھا نہیں سمجھتا ۔کوئی اس بات سے کبیدہ خاطر ہے کہ میرا دوست میرے اہل خانہ کے ساتھ نامناسب حد تک گھل مل چکا ہے اور میرے گھریلو معاملات میں نا گوار قسم کی مداخلت کا مرتکب ہوتا رہتا ہے لیکن کیا کروں کہہ نہیں سکتا کھل کر کہ کہیں دوستی متاثر نہ ہو۔ کوئی اس بات پر بیٹھا دل جلا رہا ہے کہ جب سے اللہ نے مجھ پر فضل کیا ہے اور میری مالی حالت پہلے سے کہیں بہتر ہو گئی ہے تب سے میرے دوستوں نے باقاعدہ حسد و بغض کا رویہ اپنا لیا ہے۔کوئی اس بات پہ زچ ہے کہ دوست کام، کاروبا ر والی جگہ پر بلا مقصد گھنٹوں آ کر بیٹھے رہتے ہیں لیکن کچھ کیا نہیں جا سکتا اس مصیبت کا، کوئی اس بات سے عاجز آیا ہوا ہے کہ دوست آرام کے وقت اور پرایویسی کا کچھ خیال نہیں رکھتے۔یعنی عجب ريا کاری ،مکر ، فريب ، منافقت اور تصنع سے سلسلے چل رہے ہوتے ہیں اصل میں لیکن لگ کچھ اور رہا ہوتا ہے سب کو۔

آٹھ رشتے مقدم ہیں: ماں، باپ، بہن، بھائی، میاں، بیوی اور بیٹا، بیٹی۔ ان میں دوستیاں تلاش کرنی چاہییں۔
نہیں؟
تو پھر ایٹ دی اینڈ آف دی ڈے یہ بات تو بہرحال ہے ہی کہ جتنا وقت، توانائی اور وسائل مخلوق کے آگے پیچھے بھاگنے میں صرف کیے جاتے ہیں اتنے اہتمام سے اگر خالق کو مرکز توجہ بنا لیا جاے تو تنہائی کا احساس ویسے ہی ختم ہو جاتا ہے۔تمام کام بھی نکلتے جاتے ہیں۔

ملٹی ٹاسکنگ

2010-04-23T10:41:00.000+05:00

میں ملٹی ٹاسکنگ کے فن کا مداح ہوں اور ان لوگوں کو توصیفی نظروں سے ہی دیکھتا ہوں جو اس فن میں یکتا ہیں ۔لیکن اس کے باوجود ملٹی ٹاسکنگ کی ایک قسم ہے جو میری سمجھ سے باہر ہے اور اس کے لیے میں ستائشی احساسات بھی اپنے دل میں نہیں پاتا۔ میرا ذہن اس بات کا احاطہ کرنے سے قاصر ہے کہ ایسا کیسے ممکن ہے کہ آپ لوگوں سے باتیں بھی کر رہے ہیں اور ساتھ ساتھ آپکی انگلیاں ہاتھ میں پکڑی تسبیح پہ بھی باقاعدہ چل رہی ہیں۔آپ دوسروں سے گفتگو بھی کر رہے ہیں اور ساتھ ذکر بھی جاری ہے۔ کانکرنٹلی۔ آخر کیسے ہوتا ہے یہ؟

پہلا ٹشو

2010-04-22T12:59:00.000+05:00

سوال یہ ہے کہ ٹشو پیپر کے نئے ڈبے میں سے پہلا ٹشو کیونکر نکالا جا سکتا ہے؟ ایسا کرنے کا کچھ تو درست طریقہ کار ہو گا نا آخر۔ اگر محض چٹکی بھرو اوپر والے ٹشو کو کہ صرف ایک ٹشو ہی باہر آئے تو اکثر یہ کوشش بے ثمر ہی رہتی ہے۔ صرف یہ ہوتا ہے کہ آپ کے پے در پے چیونٹیاں بھرنے سے اوپر والے کئی ٹشو ستیاناس ہو جاتے ہیں۔پھر اگر سٹپٹا کر زور زور سے ہاتھ چلاو کہ ایک ٹشو نکل آئے تو جواب میں سارے کے سارے یعنی تمام ٹشو جو ڈبے میں ہوتے ہیں وہ باہر آ جاتے ہیں۔ اب آپ زندگی بھر بھی لگے رہیں تو ان کو اس طور واپس ڈبے میں نہیں لگا سکتے جیسے وہ اس خرابے سے پہلے لگے ہوے تھے۔

شفیق الرحمان: ایک مزاح نگار کے غم

2010-04-19T12:07:00.000+05:00

شفیق الرحمان کا نام آتے ہی مسکراہٹ اور مزاح کا تصور ہی آتا ہےذہن میں۔ حال ہی میں ان کے بارے میں ایک مضمون پڑھ کر میں حیران رہ گیا کہ شفیق الرحمان کی زندگی میں کتنے گہرے رنج و الم تھے۔
شفیق الرحمان کا تعلق ایک خوش حال، خوش باش اور تعلیم یافتہ گھرانے سے تھا۔ادب سے لگاو انہیں والدین سے ورثے میں ملا تھا۔انہیں اپنے دو بھائیوں اور ہمشیرہ سے بہت محبت تھی۔ کنگ ایڈورڈ لاہور میں تعلیم کے دوران انہیں سٹیج ایکٹر کے طور پہ اپنے جوہر دکھانے کا خوب موقعہ ملا۔انہی دنوں میں شفیق الرحمان نے اپنی پہلی کہانی ”چاکلیٹ“ لکھی۔
1940 کا لاہور ادب کا گہوارہ تھا. ایک اور افسانہ ”فاسٹ باولر“ منطر عام پہ آنے سے شفیق الرحمان کو ادبی حلقوں میں خاطر خواہ پذیرائی ملی۔فیض،منٹو، کرشن چندر،ساحر، راجندر سنگھ بیدی جیسی مایہ ناز ادبی شخصیات کی صحبت نے شفیق الرحمان کے فن تحریر کو خوب جلا بخشی۔
1942شفیق الرحمان کی زندگی کا ایک اہم سال ہے۔ اس سال انہوں نے ایک تو MBBS کا امتحان پاس کر لیا اور ساتھ ہی ان کے افسانوں کا پہلا مجموعہ”کرنیں“ شائع ہو گیا۔22 سال کی عمر میں ان کی یہ کامیابیاں قابل رشک تھیں۔1950 میں شفیق الرحمان مزید تعلیم کے لیئے برطانیہ گئے۔ تب انہیں یورپ کے طول و عرض میں سفر کرنے کا موقعہ ملا۔ ان سب تجربات کو انہوں نے اپنے سفر نامے “برساتی” کی زینت بنایا۔
غرض کہ ان کی زندگی ترقیوں، کامیابیوں اور خوشیوں کا ایک خوبصورت مرقع تھی۔پھر اچانک اس زندگی میں ایک اندوہناک موڑ آیا۔ شفیق الرحمان کے دو بیٹوں نے خودکشی کر لی۔ ان بیٹوں سے شفیق کو بے حد لگاو تھا۔انکے ساتھ شفیق ہمیشہ دوستوں کی طرح رہے اور ان کی تعلیم و تربیت میں ان کی خوب معاونت کی۔یہ معلوم نہ ہو سکا آخر کس بات نے ان دونوں کو خودکشی جیسے انتہائی اقدام پہ مائل کیا۔
اس شدید غم ناک سانحے نے شفیق الرحمان کی طبیعت پر گہرے اثرات مرتب کیے۔اپریل 1981 اور اپریل 1991کے درمیان جو خطوط انہوں نے ڈاکٹر صفیہ بانو کے نام لکھے ان میں شفیق کے کرب و الم کا بیان نظر آتا ہے۔یہ خطوط ادبی جریدے ”مکالمہ“ میں شائع ہوئے۔ہر بعد والا خط پہلے والے سے زیادہ شدت کے ساتھ شفیق کے رنج و ملال کا مظہر ہے۔
پھر ان کے بھائی خلیل الرحمان کی موت واقع ہوئی۔اور 1987 میں ان کی نو عمر بھتیجی نصرت بھی فوت ہو گئی۔ ان اموا ت نے بھی شفیق ا لرحمان کی زندگی پر گہرے اثرات چھوڑے ۔ انہی دنوں میں ان کی اہلیہ دل اور سانس کے عارضوں میں مبتلا ہو گئیں۔شفیق دونوں کی زندگی میں آنے والے گہرے غم و رنج کو اپنی شریک حیات کی بیماری کی وجہ سمجھتے تھے۔ پھر ان خاتون کو ایک ایسے مرض نے آن لیا جس میں مریض کا خون جسم سے کچھ مدت بعد نکالنا ہوتا ہے۔اسی اثنا میں شفیق الرحمان کے چھوٹے بھائی عتیق الرحمان بھی داغ مفارقت دے گئے۔
یوں تو موت کوئی انہونی چیز نہیں ہے۔ لیکن بسا اوقات اپنے پیاروں کے بچھڑ جانے کا غم سوہان روح بن جاتا ہے۔ انسان بوکھلا سا جاتا ہے ، سمجھ نہیں پاتا کہ ایسا کیونکر ممکن ہے کہ وہ لوگ جو اسکے ساتھ ایک طویل مدت تک رہے اب وہ ایسے گئے ہیں کہ اب وہ ان کی شکل تک نہیں دیکھ پائے گا، کبھی بھی ان کی آواز تک سن نہیں پائے گا۔ جبکہ ان چلے جانے والے لوگوں سے متعلق چیزیں پہلے کی طرح آس پاس موجود نظر آتی رہیں گی۔
شفیق الرحمان بھی اپنے عزیزوں کی موت سے از حد پریشان اور رنجیدہ ہو گئے تھے.مر جانے والوں کے پیچھے رہ جانے والوں کو اللہ آہستہ آہستہ صبر ضرور دیتا ہے مگر بعض اوقات بعض لوگ غم کی گہرائیوں سے باہر نکل نہیں پاتے۔ غم بنیادی طور پہ انسان کی سوچ اور خیال پر ہی مشتمل ہوتا ہے۔ لیکن اگر کسی سوچ کو ہم طویل عرصے کے لیے اپنے ذہن میں جگہ دیئے رکھیں اور ہماری ذہنی توجہ اس ایک خیال پہ ہی ہر وقت رہے تو پھر ہم مستقل ایک ہی قسم کی ذہنی کیفیت میں چلے جاتے ہیں۔ یہ کیفیت امید اور خوشی بھی ہو سکتی ہے اور مایوسی اور بے کیفی کی بھی۔جیسا خیال ویسی دل کی کیفیت۔
شفیق الرحمان آخر خود بھی 2000 میں وفات پا گئے۔ ان کے پسماندگان میں ان کا سب سے بڑا بیٹا عتیق ہے۔ انسان جب اپنی خوش باش زندگی کے پر لطف شب و روز گذ؎ار رہا ہوتا ہے تو اسے لگتا ہے کہ حالات ہمیشہ یوں ہی رہیں گے۔ اس کے وہم و گمان میں بھی نہیں ہوتا کہ ایک وقت آئے گا کہ دھیرے دھیرے سب کچھ یوں بدل جائے گا جیسے پہلے کبھی تھا ہی نہیں۔ حالات بگڑ جائیں تو پھر تو انسان اللہ کو پکارتا ہی ہے۔یہ بہت ضروری ہے کہ خوشی اور آسانی کی فراوانی والے وقت میں بھی اللہ سے اسکے فضل،رحمت، خیر و برکت اور عافیت کی دعایں مانگی جاتی رہیں۔

آوگھربیٹھ کر انٹرنیٹ پر ڈالر کمایں

2010-04-15T08:58:00.009+05:00

شاکر کے بلاگ پر یہ تحریر پڑھی تو سوچا آپ سے شیئر کر لوں ۔
پھر بدتمیز نے اس بارے میں کچھ لکھا. وہ بھی پڑھ لیں۔

پھر اس موضوع سے ہٹ کر اسد کے بلاگ پر ایک تحریر پڑھی۔ بہت محظوظ ہوا:
مولویوں سے چڑنے اور خار کھانے کے لیے وجوہات کا ہونا ہر گز ضروری نہیں۔۔۔

اور ہاں ایک اور پوسٹ جس کے ذکر کے بغیر حال ہی میں نظر سے گذرنے والی دلچسپ تحریروں کی بات ادھوری رہے گی۔ محمد ریاض شاہد نے جس کمال خوبصورتی سے دیہی زندگی کا بھر پور نقشہ اپنی اس تحریر میں کھینچا ہے وہ پڑھے جانے کے لائق ہے۔

دوری مہجوری

2010-04-15T08:49:00.000+05:00

ہم ایک ہی شخص کے ساتھ رہتے رہتے اکتا جاتے ہیں تو ایک ہی شخص سے دور رہ رہ کر بھی تو تھک جاتے ہیں۔

ڈاکٹر اسرار۔۔۔اللہ انہیں جنت میں جگہ عطا فرمائے۔ آمین

2010-04-14T15:46:00.001+05:00

آج صبح ایک ایس ایم ایس ملا جس میں بتایا گیا تھا کہ ڈاکٹر اسرار رحلت فرما گئے ہیں. خبر کی تصدیق کے لیے ٹی وی پہ دیکھا تو سی 42 پر یہ خبر مل گئی. میری دلی دعا ہے اللہ مرحوم کی بخشش فرمائے اور ان کو جنت الفردوس میں مقام عطا فرمائے. آمین.

میں نے مرحوم کو زندگی میں ہمیشہ قرآن کی بات ہی بتاتے سنا جو کہ از خود ایک بڑی بات ہے.

کیا یہ توہینِ رسالت نہیں؟

2010-04-06T08:53:00.003+05:00

ذرا ملاحظہ فرمائیے یہ۔۔۔

چوہا اور انسان

2010-03-22T17:21:00.001+05:00

(ریحان احمد یوسفی)

جنیاتی طور پر چوہا ایک ایسا جانور ہے جو انسانوں سے بہت قریب ہے۔ یہی وجہ ہے کہ سائنسدان جب انسانی بیماریوں پر تحقیق کرتے ہیں تو بالعموم چوہوں کو تختۂ مشق بناتے ہیں۔ ان میں بیماریوں کے جراثیم داخل کئے جاتے ہیں اور پھر مختلف تجرباتی دوائیں اور ویکسین دے کر ان کے نتائج دیکھے جاتے ہیں ۔ اگر یہ تجربات کامیاب رہتے ہیں تو پھر انسانوں کو یہ دوائیں دی جاتی ہیں، تاکہ حتمی نتائج کی جانچ کی جاسکے ۔

شاید یہ اسی جنیاتی مماثلت کا نتیجہ ہے کہ چوہے گھروں میں گھس کر انسانی غذائیں مثلاً روٹی وغیرہ شوق سے کھاتے ہیں اور دیگر کارآمد اشیا بھی کتر جاتے ہیں۔ اس لیے انسان انہیں سخت ناپسند کرتے ہیں اور ان سے پیچھا چھڑانے کے لیے مختلف حربے استعمال کرتے ہیں۔

آج کل چوہوں سے نجات حاصل کرنے کے لیے ایک نئی قسم کا ٹریپ استعمال ہورہا ہے۔ اس میں سے انسانی غذا مثلاً روٹی، چاول وغیرہ کی انتہائی تیز خوشبو اٹھ رہی ہوتی ہے۔ اس کی ایک سائیڈ خالی ہوتی ہے اور دوسری سائیڈ پر ایک انتہائی طاقت ور گلو (ایک اچھی قسم کا گوند) لگا ہوتا ہے۔ رات کے وقت اسے چوہوں کی آمدورفت کے راستے میں رکھ دیا جاتا ہے۔ اندھیرا ہوتے ہی چوہے خوشبو کے پیچھے دوڑتے ہوئے آتے ہیں اور اس پر چڑھ جاتے ہیں، مگر پھر انہیں اس سے کبھی اترنا نصیب نہیں ہوتا، کیونکہ انتہائی طاقت ور گلو ان کے پاؤں جکڑ لیتا ہے۔

عام چوہے دان ایک چوہے کو پکڑ کر غیر مؤثر ہوجاتا ہے، مگر یہ ٹریپ انسانی خوراک کی خوشبو کے پیچھے آنے والے مزید چوہوں کا شکار کرتا رہتا ہے۔ یہاں تک کہ ٹریپ کی جگہ ختم ہوجائے یا چوہے ختم ہوجائیں یارات ختم ہوجائے ۔ پھر صبح اس قید خانے کو چیختے چلاتے قیدیوں کے ساتھ اٹھاکر کوڑے دان میں پھینک دیا جاتا ہے۔ جہاں وہ جان سے چلے جاتے ہیں، مگر اپنی جگہ سے ہل نہیں پاتے ۔

یہ عجیب سانحہ ہے یا شاید یہ بھی جنیاتی مماثلت کا اثر ہے کہ اتنی ہوشیاری سے چوہوں کا شکار کرنے والا انسان خود بھی اکثر ایک "چوہا " ثابت ہوتا ہے۔جنس اور پیٹ کے تقاضے، اولاد کی محبت، مال کی حرص، شہرت کا نشہ، اقتدار کی ہوس، معاشرے میں بلند اسٹیٹس کی تمنا، وسیع بینک بیلنس ، بڑی بڑی جائدادیں، ترقی کرتے ہوئے کاروبار، چلتے ہوئے کارخانے، نئے ماڈل کی چمکتی دمکتی گاڑیاں، عالیشان گھر ، فارن ٹرپس اور نہ جانے کیا کچھ، یہ سب آدمی کے لیے اکثر اوقات چوہے دان ثابت ہوتے ہیں، جنھیں اس کا شکاری ، ابلیس، اس کی راہ میں رکھ دیتا ہے۔ ان کی کشش میں انسان پیغمبروں سے انگلی چھڑاکر دیوانہ وار ان کی طرف بھاگتا ہے ۔ قرآن پیچھے سے آوازیں دیتا رہ جاتا ہے کہ "یہ تو دنیا کی زندگی کا سازوسامان ہے اور جو اللہ کے پاس ہے وہ بہتر ٹھکانہ ہے" مگر کون پلٹ کر دیکھتا ہے۔

انسان خواہشات کی ایک فہرست بناتا ہے اور ان کے پیچھے دوڑ لگادیتا ہے ۔یہاں تک کہ وہ ان چیزوں کو پالیتا ہے، مگر عین اسی لمحے حالات کا "گلو" اسے جکڑلیتا ہے۔ خواہشات کی محدود فہرست ایک لامحدود چکر میں بدل جاتی ہے ۔ وہ لاکھ سر پٹخ لے، اس کے لیے ناممکن ہوتا ہے کہ وہ اس چکر سے نکل جائے۔ اس کے بعد صرف موت اس کا مقدر ہوتی ہے، پھر جو بچتا ہے، وہ درحقیقت صرف ایک چلتی پھرتی زندہ لاش ہوتی ہے، جس سے اٹھنے والے تعفن کو ہم جیسے لوگ شاید محسوس نہ کرسکیں ، مگر خدا کے فرشتے وہاں سے ناک بند کرکے گزرتے ہیں، بلکہ سچی بات یہ ہے کہ نیکی کے فرشتے تو وہاں سے گزرتے ہی نہیں، ہاں صرف وہ فرشتے گزرتے ہیں جن کا کام ایسے "چوہوں" کو وقت آنے پر اٹھا کر جہنم کے کوڑے دان میں پھینکنا ہوتا ہے۔

انسانوں کا حال یہ ہے کہ وہ ایک کے بعد ایک اس ’’ٹریپ‘‘ میں پھنستے چلے جاتے ہیں۔ وہ سمجھتے ہیں کہ پہلا ’’چوہا‘‘ بھی وہاں مزے کررہا ہے۔ اس کے دیکھا دیکھی وہ بھی اپنا حصہ وصول کرنے کے لیے اس دوڑ میں شامل ہوجاتے ہیں ۔ بالآخر سب کا ایک ہی انجام ہوتا ہے۔ البتہ جو لوگ خواہشات کے اس جال سے بچ کر نکل جائیں، ان کا استقبال عالم کا پروردگار خود یوں کرے گا:

’’اے نفس مطمئنہ، لوٹ چل اپنے رب کی طرف اس طرح کہ تو اس سے راضی اور وہ تجھ سے راضی۔ پھر داخل ہوجا میرے بندوں میں اور داخل ہوجا میری جنت میں ‘‘۔

چوہوں کو پکڑنے والو! اپنے چوہے دان کو پہچانو۔ تمہارے شکاری ابلیس نے اس دور میں نت نئے چوہے دان بنالیے ہیں۔ کہیں ایسا نہ ہوکسی روز تم بھی کسی جال میں جکڑے جاؤ اور تمہیں خبر تک نہ ہو۔

اپنے حصے کی روٹی کی تلاش میں پیغمبر سے انگلی مت چھڑاؤ ۔ کبھی خدا کی اس کتاب کو بھی پلٹ کر دیکھ لو جس کے لیے دنیا کی کامیابی اتنی ہی غیر اہم ہے جتنی تمہارے لیے آخرت ، زندگی کی شام ڈھلنے کو ہے۔ کیوں فانی دنیا کے لیے ابدی آخرت کو کھوتے ہو، کیوں عارضی لذتوں کے لیے بے مثل جنت کو کھوتے ہو:

دو چار روز اور ہے خوابوں کا سلسلہ

پھر ابد تک رہے گا عذابوں کا سلسلہ

علّا مہ طاہر الْقادری کو سجدہ ؟

2010-03-05T10:57:00.001+05:00

شخصیت پرستی انسان کو اللہ اور اس کے رسول کے بتائے ہوئے سیدھے رستے سے ہٹا کر کتنی دور لے جاتی ہے شاید اس کا کچھ اندازہ اس ویڈیو کو دیکھ کر ہو سکتا ہے:

اس روح سوختہ محفل کی تصاویر یہاں ملاحظہ کریں

اس سادگی پہ کون نہ مرجائے۔۔۔

2010-02-23T10:53:00.001+05:00

اُف۔۔۔اتنی سادگی، اسقدر اختصار۔۔۔

ادھر ملاحظہ کیجیئے

یہی وہ گھڑی ہے

2010-02-08T16:59:00.001+05:00

یہی وہ گھڑی ہے

مری جاں کہ جس میں

ضرورت تمہاری ہمیں آ پڑی ہے ۔

تمہاری طرف سے کوئی حرفِ شفقت ،

کوئی حوصلہ، درد کا کوئی چارہ

ہمارے لیے بات سب سے بڑی ہے۔

رُوبہ زوال ہاسٹنگ

2010-02-03T16:29:00.001+05:00

میری ہاسٹنگ سروس والے رُوپے کے لالچ کا شکار ہو گئے ہیں۔جیسا کہ زمانہ قدیم سے انسانوں کے ساتھ ہوتا چلا آیا ہے۔ ان کے سرورز پہ لوڈ بڑھتا چلا جا رہا ہے جس کی وجہ سے ہماری سائٹس کا ڈاون ٹائم بھی بڑھتا چلا جا رہا ہے۔ہاسٹنگ سروس والے اس ضمن میں کچھ کرنا نہیں چاہتے۔ ظاہر ہے سرور سپیس میں اضافہ کرنے کے لیئے رقم خرچ کرنا پڑتی ہے،

اس صورتحال سے میرا یہ نوزائیدہ بلاگ بھی متاثر ہوا ہے۔ مانا کہ اس پہ قارئین فی الحال خال خال ہی آتےہیں لیکن بہرحال پھر بھی دل تو چاہتا ہے نا کہ سائٹ درست طور پر چلتی رہے۔

دیکھیں اب کیا بنتا ہے۔ یہ بھی تو ممکن ہے کہ خراب کارگردگی سے نالاں ہو کر جب لوگوں کی کافی بڑی تعداد اس ہاسٹنگ سروس کو چھوڑ جائے تو سرور پہ لوڈ خود بخود کم ہو جائے۔۔۔

بہارآئی

2010-01-29T19:20:00.000+05:00

کل یوں لگا جیسے موسم بدلنے کو ہے۔ دھوپ میں کھڑی گاڑی میں کچھ دیر بعد آ کر بیٹھنے سے جسم و جاں کو جو ایک زندگی آمیز حدت ملتی تھی آج اس کی جگہ کچھ گرمی کا احساس ھوا-فوراً ہی شیشے اتارنے کو دل چاھا۔ پھر چلتی گاڑی میں جہاں شیشہ نیچے کرنے سے ٹھنڈ سی لگتی تھی آج دونوں شیشے اتار کر بھی ایسا نہ لگا بلکہ جو تیز ہوا کے جھونکے آئے وہ نہایت خوشگوار لگے۔ وہ ہوا اپنے اندر بہار کی ایک خبر سی لئے ہوے تھے۔

وعدہ خلافی

2010-01-21T08:58:00.001+05:00

آنا تھا اس کو پر نہیں آئی

یہ بھی عجب ہی بات ہوئی

اسی سوچ میں شام ڈھلی

اور دھیرے دھیرے رات ہوئی

جانے اب وہ کہاں پہ ہو گی

عنبر کی مہکار لیئے

بیٹھے رہ گئے ہم تو یونہی

پھولوں کے کچھ ہار لیئے

ایک کار آمد پلگ اِن

2010-01-20T22:32:00.001+05:00

جب کوئی قاری آپ کے بلاگ پرکوئی تبصرہ کر چُکتا ہے تو اس کی خواہش ہو تی ہے کہ وہ اپنے تبصرے کے بعد ہونے والے مزید تبصروں سے آگاہ رہ سکے۔ اب ہر ایسے صفحے کو بکمارک کرنا ممکن نہیں ہوتا اور نہ ہی زبانی یاد رکھا جا سکتا ہے کہ کس کس بلاگ پرکسی نے کہاں کہاں تبصرے لکھے تھے۔

اس کے بہترین حل کے لئے اکثر بلاگز پر کمینٹ باکس کے نیچے ایسا ایک چیک باکس موجود ہوتا ہے

Notify me of followup comments via e-mail

جسے کلک کرنے سے بعد میں ہونے والے ہر تبصرے کی بابت آپ کو بذر یعہ ای میل اس ای میل ایڈریس پر آگاہ کر دیا جاتا ہے جو اپنا تبصرہ لکھتے وقت آپ نے ای میل ایڈریس والے خانے میں لکھا ہوتا ہے۔ بعد ازاں آپ جب چاہیں کسی بھی پوسٹ کے کمینٹ فالو اَپ سے اَن سبسکرا ئیب کر سکتے ہیں۔

لیکن ہر تھیم میں اوپر بیان کردہ آپشن موجود نہیں ہوتا۔ تاہم آپ یہ پلگ اِن اِنسٹال کر کہ یہ والا آپشن اپنے بلاگ پردستیاب کر سکتے ہیں۔ یہ اضافہ آپ کے بلاگ پہ تبصرہ چھوڑنے کے خواھشمند قارئین کے لئے ایک بڑی سہولت کا سبب ہو گا۔

یہ پلگ اِن آپ ورڈ پریس کی سائیٹ سے بھی ڈاونلوڈ کر سکتے ہیں۔ اور ورڈ پریس کے ڈیش بورڈ پہ رہتے ہوئے Add New Plugins کے ذریعے اسے براہ راست بھی اِنسٹال کیا جا سکتا ہے۔ اس کے لئے وہاں سرچ باکس میں subscribe to comments لکھنا ہو گا۔ آنے والی لسٹ میں پہلا پلگ اِن یہی ہو گا۔

ادراک کا شاخسانہ

2010-01-16T18:52:00.001+05:00

جنوری۲۰۰۷ کی ایک سرد صبح ہے۔ واشنگٹن ڈی سی کے زیر زمین ریلوِے سٹیشن میں معمول کی گہما گہمی جاری ہے۔ 45 منٹ میں تقریباً دو ھزار لوگ وہاں سے گزرے جن میں سے بیشتر اپنے کاموں کی جانب رواں دواں تھے۔ اِن 45 منٹوں میں ایک وائلن نوازنے وہاں باخ کی چھ دھنیں بجائیں۔
کوئی تین منٹ بعد ایک درمیانی عمر کے آدمی نے دھیان کیا کہ کوئی موسیقار وہاں کچھ بجا رہا ہے۔وہ آہستہ ہوا، چند ثانیوں کے لِیے وہاں رکا اور پھر سرعت سے اپنی منزل کی جانب چل پڑا۔
چار منٹ بعد:
وائلن نواز کو پہلا ڈالر ملا جو ایک عورت نے چلتے چلتے، بِنا رکےاس کے ہیٹ میں پھینکا تھا۔
چھ منٹ بعد:
ایک نوجوان ذرا دیر کو موسیقار کو سننے کے لیے دیوار سے ٹِک کر کھڑا ہوا لیکن پھر اس نے اپنی گھڑی پہ نگاہ ڈالی اور دوبارہ چل پڑا۔
دس منٹ بعد:
ایک تین سالہ بچہ رکا تو مگر اس کی ماں اسے کھینچے لیے گئی۔ بچہ وائلن نواز کو دیکھنے کو ایک بار پھر ٹھیرا لیکن اپنی ماں کے زور کے باعث اسے چلتے ہی بنی۔ تاہم وہ مڑ مڑ کر موسیقار کو دیکھتا رہا۔ دیگر بچے بھی اس موسیقار کو دیکھ کر ایسا ہی ردعمل کرتے رہے جبکہ تمام والدین رکنے کے خواھشمند بچوں کوجلدی جلدی آگے بڑھنے پہ مجبور کرتے رہے۔

45منٹ گزرے:
موسیقار تسلسل سے وائلن بجاتا رہا۔ صرف چھ لوگ پل بھر اسے سننے کو رکے۔ قریباً بیس لوگوں نے اسے کچھ پیسےد یئے لیکن بِنا رکے۔ کُل رقم بارہ ڈالر بنی۔
ایک گھنٹے بعد:
موسیقار نے واِئلن بجانا اب بند کر دیا ہے۔ خاموشی چھا گئی ہے۔ کسی نے دھیان نہیں دیا- نہ کوئی واہ واہ ہوئی نہ کوئی قدر شناس نکلا۔

کسی کو پتا ہی نہیں چلا لیکن وہ شخص دنیا کے عظیم ترین موسیقاروں میں سے تھا- وہ وائِلن نواز جوشوا بیل تھا۔ جو دھن اس نے بجائی تھی وہ دنیا کی پیچیدہ ترین دھنوں میں سے ایک تھی۔ اور جس وائلن پہ بجائی تھی اس کی قیمت پینتیس لاکھ ڈالر تھی۔ دو دن قبل ہی جوشوا کے ایک شو کے لیے بوسٹن کے ایک تھیٹرمیں اوسطاً سو ڈالر فی ٹکٹ کے حساب سے تمام ٹکٹ فروخت ہو چکے تھے۔

یہ ایک معاشرتی تجربہ تھا جو روزنامہ واشنگٹن پوسٹ نے ترتیب دیا جسکا مقصد لوگوں کے ذوق،ترجیحات اور ادراک کے بارے میں جاننا تھا۔اس کے لئے جوشوا کو بھیس بدلوا کر اس ریلوے سٹیشن میں وائلن بجانے پہ مامور کیا گیا۔ نتیجۃً کچھ سوالات سامنے آئے:

ایک روزمرہ کے عام ماحول میں اپنے معمو لات کے اوقات میں کیا ہم خوبصورتی کا ادراک کرنے کی اہلیت رکھتے ہیں؟ کیا ہم اس خوبصورتی سے لطف اندوز ہو سکتے ہیں؟ کیا ہم ایک غیر متوقع قرینےمیں کسی فنکار کےہنر کی قدر افزائی کرنے کی صلاحیت رکھتے ہیں؟

اس تجربے سےجو ایک ممکنہ نتیجہ اخذ کیا جا سکتا ہے وہ یہ ہے:

اگر ہم ایک عظیم موسیقار کوایک خوبصورت ترین ساز پر بےپایاں عمدگی کی حامل ایک دھن بجاتے سننے کے واسطے چند لمحات نہیں نکال سکتے تو پھر اپنے اطراف میں اور کتنی بہت سی حسین چیزوں کو ہم روزانہ اپنی کوتاہ بینی کی بھینٹ چڑھا دیتے ہیں؟

خوبصورت زندگی کو ہم نے کیسے گزارا!

2010-01-13T13:55:00.000+05:00

خاص طرح کی سوچ تھی جس میں سید ھی بات گنوا دی
چھوٹے چھوٹے وہموں ہی میں ساری عمر بتا دی

ایسا کیوں ہوتا ھے؟

2010-01-11T23:20:00.000+05:00

کافی عرصہ سے یہ سوال دل میں تھا سوچا آج پوچھ لیتا ہوں: یہ جو کھانا بچے اپنے لنچ باکس میں سکول سے بچا کر لاتے ہیں وہ کھانا بڑوں کو کھانے کا آخر اتنا مزہ کیوں آتا ھے باوجود اس کے کہ وہ کھانا سرد ہو چکا ہوتا ھے- اگر ویسا عجیب ذائقے والا کھانا ہمیں کسی ھوٹل یا گھر میں دیا جائے تو ہم اسے کھانے سے انکار کر دیں-
تو پھر بچوں کے سکول کے بچائے ہوئے لنچ میں کیا بات ھوتی ھے کہ بڑے اس کے لیے دل میں ایک خاص حرص وطمع محسوس کرتے رہتے ہیں جب تک وہ لنچ کسی نہ کسی طور ٹھکانے نہ لگا دیا جائے؟

عا لمی یوم مردانگی

2010-01-02T04:47:00.001+05:00

(یہ مجھے شاید میل میں ملا تھا)

مرد اگر عورت پر ہاتھ اٹھاے تو ظالم اور اگر عورت سے پٹ جائے تو زنانہ۔عورت سے آگے چلے تو فرعون اور پیچھے چلے تو زن مرید۔اگر عورت کو چھوڑ دے تو سنگدل لیکن عورت اسے چھوڑ دے تو نامرد۔عورت کو کسی اور کے ساتھ دیکھ کر مشتعل ہو جائے تو جیلس(جل کڑا)اگر مشتعل نہ ہو تو بےغیرت۔عورت کو کام کرنے سے روکے تو دقیانوس نہ روکے تو عورت کی کمائی کھانے والا۔عورت پے شک کرے تو نفسیاتی مریض اور نہ کرے تو بے حس اور اگر عورت اس پے شک کرے تو بے وفا۔

مرد اگر گھر سے باہر رہے تو آوارہ اگر گھر میں رہے تو ناکارہ. بچوں کو ڈانٹے تو جابر نہ ڈانٹے تو لاپرواہ۔ عورت سے چھیڑ چھاڑ کرے تو فرسٹریٹڈ لیکن عورت کی چھیڑ چھاڑ پر برا مانے تو بیوقوف۔ عورت کی تعریف کرے تو فلرٹ نہ کرے تو بد مزاج۔ بحث کرے جھکی نہ کرے تو میسنا کہلائے۔ گرل فرینڈ یا بیوی کی فرمائش پوری نہ کرے تو کنجوس اور اپنے لیے کچھ نہ خریدے تو زندگی سے بے زار۔

عورت نے تو چیخ چلا کر رو دھو کر عالمی یوم خواتین منانے کا حق منوا لیا لیکن اپنی ہی مردانگی کے بھاری پتھر تلے کراہنے والے آدمی کا عالمی یوم کب منایا جائے گا ؟۔کیا مرد کی قسمت میں صرف عورت کو منانا ہی لکھا ہے؟

کب تک یہ ظلم ہو گا ہم پے بھائی لوگ آخر کب تک ؟